15,643 total reads
Pinag-aaralan ng Mababang Kapulunang ang posibilidad na gawing isang beses na lamang ang pagpataw ng Value Added Tax o VAT sa kuryente upang mapagaan ang pasanin ng mga konsyumer, bukod pa sa planong alisin ang system loss charges sa bayarin sa kuryente.
Ayon kay House Committee on Ways and Means Chairman Miro Quimbo, iminungkahi ng mga pinuno ng Kamara na ilipat ang 12 porsiyentong VAT sa bahagi ng generation o paggawa ng kuryente, sa halip na ipataw sa bawat bahagi ng proseso kabilang ang transmission at distribution.
“Tingnan natin kung saang areas, without reducing VAT necessarily, saan tayo puwedeng maka-reduce ng epekto nito sa ating mga kababayan,” ayon pa sa mambabatas.
Sa kasalukuyang sistema, tatlong bahagi ng industriya ng kuryente ang saklaw ng VAT, ngunit sa huli ay ipinapasa rin ang gastos sa mga mamimili.
“Sa bawat step na yan ay nag-impose tayo ng 12 percent, so pagdating sa dulo, sa consumer, binabayaran niya lahat yun. So ang gusto natin ay the rational way to really impose VAT (on electricity) is impose lang natin siya dun sa generation side,” paliwanag ni Quimbo.
Ipinaliwanag ni Quimbo na layunin ng panukala na mabawasan ang epekto ng buwis sa mga kabahayan at iba pang gumagamit ng kuryente nang hindi kinakailangang alisin ang VAT sa kabuuan.
Kasabay nito, suportado rin ng Kamara ang direktiba ni Pangulong Ferdinand Marcos Jr. na alisin ang system loss charges sa singil sa kuryente.
Ayon pa sa mambabatas na sisikapin ng Kamara na maipasa ang panukalang mag-aalis sa naturang singil bago matapos ang taon.
Layunin ng mga hakbang na mapababa ang kabuuang halaga ng binabayaran ng mga Pilipino sa kuryente, na kabilang sa mga pangunahing usapin sa harap ng patuloy na pagtaas ng gastusin sa bansa.
