15,873 total reads
Nanawagan ang Philippine Alliance of Human Rights Advocates (PAHRA) sa administrasyon ni Pangulong Ferdinand Marcos Jr. at sa Kongreso na agarang isulong ang Human Rights Defenders Protection Bill, kasunod ng ika-limang State of the Nation Address (SONA) ng Pangulo at ng pag-aresto sa ilang mga nagprotesta sa isinagawang SONA rally.
Ayon kay PAHRA Secretary General Edgar Cabalitan, bagama’t kinikilala ng organisasyon ang mga pangako ng Pangulo na mapabuti ang kalagayan ng mga Pilipino, nananatili namang kulang ang mga ito dahil hindi nabigyang-pansin ang patuloy na kalagayan ng mga tagapagtanggol ng karapatang pantao at ang pangangailangang maipasa ang panukalang batas na magbibigay sa kanila ng legal na proteksyon.
Binigyang-diin ng PAHRA na patuloy na nahaharap ang mga human rights defenders sa harassment, surveillance, red-tagging, arbitrary arrests, at criminalization, kaya’t mahalagang magkaroon ng batas na magtitiyak sa kanilang kaligtasan habang isinusulong ang karapatan ng mamamayan.
“Without legal protection for human rights defenders, these pronouncements risk becoming little more than public relations statements. If the government is serious about protecting people’s rights, it must also protect the people who defend those rights every day,” Dagdag ni Cabalitan.
Kasabay nito, kinondena rin ng PAHRA ang pag-aresto sa ilang mga nagprotesta sa kasagsagan ng SONA, na ayon sa grupo ay isinagawa sa mga kuwestiyonableng batayan habang ginagamit lamang ng mga ito ang kanilang karapatan sa mapayapang pagtitipon at malayang pagpapahayag.
“A government cannot claim to uphold democracy while peaceful protesters are being arrested for asserting their rights. Freedom of expression and peaceful assembly are constitutional guarantees, not privileges that can be withdrawn at the convenience of authorities,” Pahayag ng organisasyon.
Muli ring iginiit ng PAHRA na ang agarang pagpasa sa Human Rights Defenders Protection Bill ay mahalagang hakbang upang mapangalagaan hindi lamang ang mga tagapagtanggol ng karapatang pantao kundi maging ang demokrasya at pananagutan sa bansa.
Patuloy ring ipinapaalala ng Simbahang Katolika, ang paggalang sa dignidad ng bawat tao, sa kalayaan sa pagpapahayag, at sa mapayapang pakikilahok sa lipunan ay mahalagang sangkap ng kabutihang panlahat.
