28,856 total reads
Iginiit ng IBON Foundation na kinakailangang maglatag ang pamahalaan ng pangmatagalang mga programa upang matugunan ang mga pangunahing suliranin sa ekonomiya, kabilang ang kawalan ng trabaho at pagpapalakas ng agrikultura at iba pang industriya ng bansa.
Sa panayam sa espesyal na programang “Pag-uulat sa Bayan: State of the Nation Address 2026” ng Radyo Veritas, sinabi ni Rosario Bella Guzman, Executive Editor at Head of the Research Department ng IBON Foundation, na bagama’t binigyang-diin ni Pangulong Ferdinand Marcos Jr. ang epekto ng oil price shocks sa ekonomiya, hindi naman aniya naging sapat ang mga inilahad na tugon ng pamahalaan.
Ayon kay Guzman, kapansin-pansin din ang kakulangan ng mga long-term solution o pangmatagalang hakbang upang lutasin ang mataas na antas ng kawalan ng trabaho sa bansa.
“So parang bitin kasi kapag State of the Nation dapat ang latag nun, ano yung mas long-term na maaddress niya yung structural problems. So again para sa IBON Foundation hinihintay natin yung paglatag ng program, economic planning that will create jobs, that will revitalize genuinely yung agrikultura at industriya…” Ayon kay Guzman.
Binigyang-diin din nito na sa halip na umasa lamang sa pagpasok ng dayuhang pamumuhunan, mahalagang magkaroon ng komprehensibong plano upang makalikha ng disenteng trabaho para sa mga Pilipino at mabawasan ang patuloy na pag-alis ng mga manggagawa upang magtrabaho sa ibang bansa.
Kaugnay nito bahagi ng itinuturo ng Catholic Social Teaching na ang ekonomiya ay nararapat maglingkod sa tao at hindi ang tao para sa ekonomiya.
Nasasaad sa panlipunang turo ng Simbahan na ang tunay na pag-unlad ay nasusukat sa paglikha ng marangal na hanapbuhay, pagpapalakas ng lokal na produksyon, at pagtiyak na ang bunga ng kaunlaran ay mararamdaman ng lahat, lalo na ng mga mahihirap at manggagawa.
