156,115 total views
Kapanalig, sa anumang hakbang., planong gagawin., polisiyang ipapatupad.,mga pangakong binitiwan, o mga usapin na sadyang iniiwasan. Lagi itong may kulang. Hindi ibig sabihin, likas na sa tao ang hindi nakukuntento.
Sa halos 188-minutong SONA ni PBBM, marami ang palakpakan, makailang ulit din ang standing ovation ng mga panauhin sa gallery o session hall ng Mababang Kapulungan ng Kongreso, pero napakarami pa ring usapin ang nakaligtaang ilahad sa mamamayang Pilipino.
Kapanalig, hindi nasabi, hindi ini-ulat ni PBBM sa kanyang mga boss na Pilipino ang tunay na kalagayan ng bansa. Ang pangunahing layunin ng SONA ay i-ulat ng pangulo ang tunay na kalagayan ng bansa, bakit sa lahat na nagdaang pag-uulat sa bayan ay ikinukubli ito ng pinakamataas na lider sa taumbayan?
Palakpakan si PBBM sa pangakong alisin na ang system loss charges sa electricity bill, pero kailangang pang amyendahan ang depektibong EPIRA law bago ito maisakatuparan. Aalisin din daw ng pangulo ang 12-percent na VAT, na nagpapahirap sa mga ordinaryong mamamayan.
Positibo din ang pagtutok sa pagpapalakas ng serbisyong panlipunan, magpapabuti sa sektor ng edukasyon, pangangalagang pangkalusugan, disenteng trabaho daw? Repormang agraryo pero marami ang umaalma, pagpapalakas sa laban sa katiwalian-ilang big fish kaya ang makukulong? Isasakatuparan din ng kasalukuyang administrasyon ang reporma sa sektor ng enerhiya na nagpapahirap sa mga consumer at pagtatanggol sa soberenya ng Pilipinas sa West Philippine Sea bagama’t laging kawawa ang puwersa ng AFP at mga mangingisda dahil sa harassment, pambu-bully ng China.
Pero Kapanalig, ekis naman para sa taumbayan ang pagsusulong ng administrasyong Marcos sa paggamit ng natural gas, nuclear power at waste to energy technologies sa halip na paglipat ng bansa sa malinis at renewable energy na community centered at climate-resilient energy system.
Nakalimutan o sadyang isantabi ni PBBM ang ilang dekada nang pagsusulong para maisabatas ang isang tunay na anti-dynasty law? Wala ding suporta ang pangulo sa pagsasabatas ng Right to Information Act.
Wala ding commitment ang pinakamataas na lider na gawing institutionalized ang transparency, alisin ang umprogrammed at discretionary funds na naging ugat ng malawakang korapsyon. Wala ding aksyon sa pag-amyenda sa bank secrecy law upang masilip ang mga financial crimes, matigil ang money-laundering at masawata na ang tax evasions.
Bagkus Kapanalig, mas ipinagmamalaki at prayoridad pa ni PBBM ang dole-outs program tulad ng TUPAD, AICS, PAFF, MAIFIP na sanhi ng political patronage.
Sumakatuwid, ang mga ginagawa at gustong gawin ng pamahalaan ay pawang pandanliang solusyon, walang itong pangmatagalang tugon sa mga suliraning kinakaharap ng mamamayang Pilipino.
Sinasabi ni Pope Francis na nakakabuti ang politika kung ito nagsisilbi sa mamamayan at hindi sa personal na interes, interes ng mga kamag-anak, kaibigan, partido at mayayamang donors.
Ang payo sa mga lider ng bansa, isapuso ang Mark 10:45: na nagsasabing “For even the Son of Man came not to be served but to serve, and to give his life as a ransom for many.’ Catholic public servants are called to serve their communities with humility and love.
Sumainyo ang Katotohanan.
