840 total reads
Nanawagan ang International Committee of the Red Cross o ICRC ng mga hakbang upang mapahupa ang tumitinding tensyon at labanan sa Middle East, partikular sa Yemen at Saudi Arabia.
Ayon kay ICRC President Mirjana Spoljaric, nanganganib na lumawak pa ang labanan sa Gitnang Silangan na maaaring magpalala sa matinding humanitarian crisis na nararanasan ng milyon-milyong tao.
Binigyang-diin ng ICRC na kailangang tiyaking napoprotektahan ang mga sibilyan at mahahalagang imprastraktura, kabilang ang mga pasilidad pangkalusugan, suplay ng tubig, langis, at kuryente.
“The recent escalation of hostilities in the Middle East affecting Yemen and Saudi Arabia risks a further expansion of conflict in the region that, if not contained, could worsen the already devastating humanitarian situation faced by millions of people. Concrete steps must, at all times, be taken to protect civilians and essential infrastructure. If the fighting continues, we fear it will lead to more deaths and injuries, population displacement and a potentially catastrophic disruption of essential services and infrastructure such as health care, water, fuel and electricity,” ayon sa mensaheng pinadala ng ICRC sa Radyo Veritas.
Iginiit din ng organisasyon na mahalaga ang humanitarian action sa pagtugon sa epekto ng digmaan, ngunit hindi nito maaaring palitan ang paggalang sa international humanitarian law at ang political commitment na mapahupa ang labanan.
Nagbabala ang ICRC na kung magpapatuloy ang alitan, maaari itong humantong sa mas maraming pagkamatay at pagkasugat, paglikas ng mga inosenteng mamamayan at pagkagambala sa mahahalagang serbisyong publiko.
Patuloy namang nakikipag-ugnayan ang ICRC sa magkabilang panig upang isulong ang paggalang sa international humanitarian law.
Ang panawagan para sa kapayapaan at proteksyon sa dignidad ng bawat tao ay naaayon sa mensahe ni Pope Francis sa encyclical na Fratelli Tutti, na apela para sa fraternity o pagkakapatiran at social friendship bilang daan tungo sa kapayapaang nakabatay sa dignidad ng tao at pagtanggi sa digmaan bilang solusyon sa alitan.
