1,501 total reads
Nanawagan ang Catholic Educational Association of the Philippines (CEAP) na ipagpatuloy at gawing pangmatagalan ang mga reporma sa edukasyon, anuman ang pagbabago sa mga administrasyon at pamumuno ng pamahalaan.
Ito ang mensahe ni Sister Aileen Bonifacio, SPC, Executive Vice-President ng St. Paul University Quezon City, na kumatawan sa CEAP sa Education Governance Forum ng The Asia Foundation na may temang “The Next Two Years: Securing the Philippines’ Education Gains,” na ginanap ngayong linggo sa Makati City.
Binigyang-diin sa forum ang pangangailangang maisama sa mga institusyon ang kasalukuyang mga reporma kahit magkaroon ng pagbabago sa political at administrative leadership.
Iginiit ni Technical Education and Skills Development Authority o TESDA secretary Francisco “Kiko” Benitez na dapat maging higit sa isang administrasyon ang reporma sa edukasyon at maiwasan ang paulit-ulit na panandaliang solusyon.
“Presidents change, secretaries change, leaders change. An education must be bigger than any administration. Habang hindi natin kayang lutasin sa loob ng natitirang dalawang taon ang mga structural problems na ilang dekada nang naipon, maaari nating gamitin ang panahong ito para putulin ang cycle ng short-term solutions. Maaari nating ilatag ang pundasyon para sa 10-year National Education and Workforce Development Plan,” ayon sa mensahe ni Benitez.
Iginiit naman ni Congressman Jude Acidre, Co-Chairperson ng Second Congressional Commission on Education o EDCOM 2, na mas mahaba ang panahon ng pangangailangan sa edukasyon kaysa sa termino ng mga halal na opisyal.
Binigyang halimbawa niya ang isang batang magsisimula ng kindergarten ngayong 2026 na inaasahang magtatapos ng senior high school pagsapit ng 2039, na sasaklaw sa ilang Kongreso at presidential administrations.
Tinalakay rin sa forum ang kahalagahan ng local at community ownership, kung saan dapat magkaroon ng sapat na espasyo ang mga paaralan at lokal na pamahalaan na tumugon sa kanilang partikular na kalagayan, habang nakikilahok ang mga komunidad at benepisyaryo sa pagpapatupad ng mga reporma.
