48,431 total reads
Hindi na kailangang sagutin ni Vice President Sara Duterte ang 104-item Request for Admission ng House prosecution sa impeachment trial.
Ito ang naging ruling ng Senate Impeachment Court matapos tumutol ang kampo ni Duterte sa kahilingan ng prosecution na ipaamin sa kanya ang ilang bagay tungkol sa kanyang personal na kalagayan, mga dating posisyon sa gobyerno, negosyo ng kanyang asawang si Manases Carpio, at ilang BIR at bank records.
Ayon sa impeachment court, hindi maaaring gamitin ang Rule 26 ng Rules of Civil Procedure para pilitin si Duterte na magbigay ng sagot na maaaring gamitin laban sa kanya.
Binigyang-diin ng korte na nananatiling protektado sa impeachment proceedings ang constitutional right laban sa self-incrimination.
“While the Impeachment Court welcomes the Prosecution’s desire to narrow the issues for trial, identify matters genuinely in dispute, and avoid unnecessary proof of uncontroverted matters, any such measure to expedite the proceedings must always yield to the protection of the substantial rights of the Respondent under the Constitution,” ayon pa sa desisyon.
Nilinaw din ng korte na hindi maaaring gamitin ang naturang request para ilipat sa respondent ang tungkuling magpatunay sa mga alegasyon. Kundi ay nasa prosecution pa rin ang burden of proof at kailangan nitong magharap ng sapat at wastong ebidensya.
Gayunman, hindi pinagbigyan ng korte ang hiling na tuluyang burahin ang Request for Admission. Mananatili ito sa rekord ng impeachment proceedings, kasama ang objection at ruling ng korte, ngunit wala itong evidentiary o prejudicial effect laban kay Duterte.
“HOWEVER, her prayer to expunge the Request is DENIED. The Request, the Objection, and this ruling shall remain in the record as part of the proceedings, but the Request for Admission shall have no evidentiary or prejudicial effect against Respondent.”
Noong Setyembre 28, sinabi rin ng prosecution na handa nitong bawiin ang request at sa halip ay humingi ng mga bagay na maaaring pagkaisahan ng magkabilang panig.
Una na ring inihain ni Prosecutor Rep. Manuel Diokno ang ‘Request for Admission’ na layuning mapaigsi ang paglilitis.
Ang Request for Admission ay pormal na kahilingan ng isang panig sa kaso na aminin o kumpirmahin ng kabilang panig kung totoo ang ilang dokumento, para hindi na kailangang patunayan pa ang mga ito sa paglilitis.
Sa kaso ni VP Sara Duterte, sinabi ng impeachment court na hindi siya maaaring piliting sagutin ito dahil sa kanyang karapatan laban sa self-incrimination.
