537 total reads
Pinasalamatan ni Father Manny Bolilia – Head ng San Sebastian Basilica Conservation and Development Foundation, at nanguna sa paghahanda para sa kapistahan ng ika-400 taon ng Our Lady of Mt. Carmel sa Pilipinas, ang mga mananampalataya at mga tumulong sa matagumpay na traslacion ng Mahal na Birhen ng Bundok ng Carmelo.
Ayon kay Father Bolilia, kahanga-hanga ang ipinamalas ng mga deboto ng Mahal na Ina at ng Poong Hesus Nazareno na lalo na sa bahagi ng pagdaraos ng Dungaw.
Umaasa ang Pari na sa pamamagitan ng pagasagawang muli ng pagdungaw ng Poong Hesus Nazareno ay maibabalik na ang simbolikong tradisyon ng pagtatagpo ng Mahal na Ina at ng Anak nitong nagpasan ng Krus patungo sa bundok ng kalbaryo.
“Ako po’y nagpapasalamat at natutuwa dahil sa mainit na pagtanggap at pagsama sa pagdiriwang na ito ng ika-400 taon ng birhen ng Carmel. Yun [Dungaw] ay talagang makasaysayan at makahulugan. Talagang pinaghandaan ng Quiapo yun at sana ay muling maulit ito.” pahayag ni Father Bolilia sa Radyo Veritas.
Batay sa pagtataya ng Emergency Response Integration Center, umaabot ng 4,000 mga mananampalataya ang nakilahok sa pagsisimula ng traslacion na umabot ng 16,000 habang papalapit sa Minor Basilica of the Black Nazarene.
Nagpapasalamat naman ang buong pamunuan ng San Sebastian Church sa mapayapang pagdaraos ng traslacion ng Birhen ng Carmel, at sa taimtim na pakikiisa dito ng mga mananampalataya.
