Hinihimok ng CBCP-NASSA/Caritas Philippines ang pamahalaan na bilisan ang paglikha ng Disaster Risk Reduction Department.
Ito ang hamon ng Caritas Philippines sa administrasyong Duterte matapos ang ika-39 na National Social Action General Assembly na dinaluhan ng may 61 mga Diocesan Social Action Centers at matinding hagupit ng ulan at baha sa Metro Manila at karatig lalawigan.
Naniniwala si Father Edwin Gariguez, executive Secretary ng komisyon na mahalagang maging isa at mapalakas ang ahensya na namamahala sa paghahanda, at pagtugon sa mga kalamidad sa bansa tulad ng giyera sa Marawi, at pagputok ng bulkang Mayon.
Sinabi ng Pari na sa pamamagitan nito ay mas magiging matalino ang mamamayan sa kanilang dapat gawin sa oras ng sakuna, at mas magiging maagap din ang pagtugon ng pamahalaan.
“It is very urgent that we have a single government agency in-charge of disaster preparedness, mitigation and response to be able to provide consistent training, craft better policies and act on pressing DRR concern,” pahayag ni Father Gariguez sa Radio Veritas
Binigyang diin pa ng pari na ang naranasan ngayon na matinding pagbaha sa malaking bahagi ng Luzon ay nagtuturo din sa mga tao na kinakailangang maging mas disiplinado at mas mahigpit ang pagpapatupad ng pamahalaan sa mga batas tulad ng Solid Waste management at sa pagbabawal sa mga quarry sa kabundukan.
“The recent flooding in Metro Manila is also asking us to be more conscious in finding innovative solutions to solid waste management in urban settings. This also puts us in urgent position to campaign with the government and our communities for proper law enforcement, sustained cooperation and better appreciation of continuing DRR and climate change initiatives,” dagdag pa ng Pari.
Matatandaang noong kasagsagan ng malakas na ulan ay tone-toneladang masura ang napadpad sa kahabaan ng Roxas Boulevard.
Samantala, nabalot naman sa makapal na putik ang malaking bahagi ng Marikina matapos humupa ang baha dito na dulot ng walang tigil na pag-ulan noong sabado.
