327 total views
Hindi kailanman magiging katanggap-tanggap ang death penalty o ang pagpapataw ng parusang kamatayan.
Ito ang nasasaad sa inaprubahan ng Kanyang Kabanalan Francisco na pagbabago sa Catechism of the Catholic Church kaugnay sa naaangkop na kaparusahang dapat ipataw ng estado sa mga nagkasala o lumabag sa batas.
Kaugnay nito, mariin din ang paninindigan ng Catholic Bishops Conference of the Philippines o CBCP laban sa pagbabalik ng parusang kamatayan sa bansa.
Tiniyak ni Bro. Rudy Diamante – Executive Secretary ng CBCP – Episcopal Commission on Prison and Pastoral Care na puspusan ang pagbabantay ng kumisyon sa anumang tangka ng mga mambabatas na muling maisabatas ang Capital Punishment sa Pilipinas.
Ayon kay Diamante, kabilang sa mga binabantayan ng CBCP-ECPPC ay ang maaring pagpapasok ng parusang kamatayan sa binabalangkas na National Security Act ng mga mambabatas.
“We are monitoring the issue of the Death Penalty, We understand sa House of the Representatives merong ipinapasok na parusang bitay doon sa Security Act kasi merong Bill on National Security Act na parang doon yung parusa sa lalabag doon sa Security Act na yun will be punish by death, so medyo yun sinusubaybayan natin yun, minomonitor…” pahayag ni Diamante sa panayam sa Radio Veritas
Puspusan naman ang pagsusulong ng kumisyon na magkaroon ng pagbabago sa Punitive Mentality na namamayani sa bansa.
Sa pamamagitan ng taon-taong paggunita ng Prison Awareness Week ay umaasa ang Simbahan na mapukaw ang damdamin ng mga mamamayan na bigyang pansin ang kalagayan ng mga bilango sa ating bansa.
Ngayong taon, tema ng 31st Prison Awareness Sunday ang “Lord, that I may See, Hear and Act on the plea for help of Your People”.
Layon nitong maipaalala ng Simbahan sa bawat isa na ipanalangin ang kapakanan, pagbabago at pagbabalik-loob ng mga bilanggo sa buong bansa.
Batay sa pinakahuling tala ng Bureau of Jail Management and Penology, umaabot na sa higit 131 – libo ang bilang ng mga bilango sa buong bansa kung saan sa bilang na ito higit sa 31-libo ang nagmula sa National Capital Region.
