640 total reads
Tiniyak ng isang opisyal ng Catholic Bishop Conference of the Philippines na tumutulong ang Simbahang Katolika sa mga Overseas Filipino Workers.
Ayon kay Balanga Bataan Bishop Ruperto Santos, Chairman ng CBCP – Episcopal Commission on Migrants and Itinerant People, may mga programa ang iba’t ibang Diyosesis na tumutugon sa pangangailangan ng mga OFW partikular ang mga nakararanas ng paghihirap sa ibang bansa at maging ng mga pamilyang naiwan sa Pilipinas.
“Our Diocesan migrant Ministries have Scholarships programs for the Children of our OFW’s especially whose Parents suffered difficulties, repatriation.” pahayag ni Bishop Santos sa Radio Veritas.
Ang pahayag ng Obispo ay kaugnay sa pagpapauwi sa ilang OFW dahil sa hindi magandang nararanasan sa ibayong dagat tulad ng mahigit isanlibong manggagawa sa isinarang Azmeel Contracting Corporation sa Al Khobar Saudi Arabia, mga napalayang Filipino Seamen sa Nigeria at ang 22 OFW truck drivers na nasagip ng mga otoridad sa Padborg Denmark.
Ayon kay Bishop Santos, bukod sa scholarship para sa mga kabataan ay maari ring makinabang ang mga OFW sa mga programang pangkabuhayan at makalapit sa mga kooperatiba upang makahiram ng pampuhunan sa hanapbuhay na ipupundar.
Batay sa ensiklikal ni Saint Pope Paul VI na Populorum Progressio na nailathala noong ika – 26 ng Marso 1967, binigyang diin dito na alinsunod sa turo at misyon ng Panginoong Hesukristo na i-angat ang pagkatao ng bawat indibidwal ay tinutugunan ng Simbahan ang pangangailangan ng mga naisasantabing sektor ng lipunan.
Sa tala ng Philippine Statistics Authority mahigit sampung milyong Filipino ang nangingibang bansa upang maitaguyod ang pangangailangan ng pamilya sa Pilipinas kung saan marami dito ang nakararanas ng pananamantala at kakulangan sa benepisyong ibinibigay ng kanilang mga employer.
