452 total views
Pangungunahan ni Papal Nuncio to the Philippines Archbishop Gabriele Caccia ang misa para sa 9th Central Luzon Youth Pilgrimage (CLYP) na magsisimula sa ika-29 ng Nobyembre hanggang ika-2 ng Disyembre.
Tampok sa pagdiriwang ang pag-akyat ng mga kabataan sa makasaysayang Mt. Samat sa Bataan kasama si Archbishop Caccia.
Sa ulat ni Radyo Veritas Cultural advocate Fr. Ronnie Fernando, higit sa 500 kabataan ang magtitipon sa pagdiriwang na pawang delegado mula sa diyosesis ng Iba, Cabanatuan, Balanga, Malolos, San Jose, Tarlac at San Fernando.
Tema ng apat na araw na pagtitipon ang ‘Panginoon, narito ang lingkod Mo suguin Mo ako’.
Ang Central Luzon Youth Pilgrimage ay unang isinagawa sa Archdiocese ng San Fernando noong 1997 at ngayong taon ang Diocese ng Balanga, Bataan ang punong abala sa pagtitipon ng mga kabataan kasabay na rin ng pagbubukas ng ‘Year of the Youth.
‘Year of the Youth’
Sa huling araw ng pagtitipon, pangungunahan naman ni Bishop Leopoldo Jaucian, chairman ng Catholic Bishops Conference of the Philippines-Episcopal Commission on Youth ang misa para sa opisyal na pagbubukas ng ‘Year of the Youth’.
Ngayong Disyembre, ipagdiriwang ng simbahan ng mga Pilipinas ang ‘Year of the Youth’ na may temang ‘Filipino Youth Mission: Beloved, Gifted, Empowered.
Sa Manila, pangungunahan ni Manila Archbishop Luis Antonio Cardinal Tagle ang misa alas-5 ng umaga sa Guadalupe Minor Seminary.
‘One Mission’
Pormal na ring inilabas ng CBCP ang official theme song ng ‘Year of the Youth’ na may titulong ‘One Mission’ na likha at isinulat ni Gino Paulo Buizon na mula sa Archdiocese ng Capiz.
Sa awitin, binigyan diin ang mahalagang bahagi ng Kabataan bilang tagapangasiwa sa mga likha ng Panginoon, paglilingkod sa kapwa na siyang magpapabago sa mundo sa kabila ng mga hamon ng kasalukuyan.
Sa tala, mula sa higit 80 milyong katoliko sa buong Pilipinas may 20 porsiyento rito ang bilang ng mga kabataan na nasa edad 15 hanggang 24.
Ang ‘Year of the Youth’ ang ikapito sa mga temang inilahad ng CBCP, upang maihanda ang mga mananampalataya sa nalalapit na pagdiriwang ng ika-500 taon ng Kristiyanismo sa Pilipinas.
