445 total views
Hinimok ng isang opisyal ng Catholic Bishops Conference of the Philippines (CBCP) ang Administrasyong Duterte na isapubliko ang mga kasunduan sa Chinese government.
Iginiit ni Father Jerome Secillano, Executive Secretary ng CBCP-Permanent Committee on Public Affairs na karapatan ng sambayanang Filipino na malaman kung ano ang mga pakinabang ng Pilipinas sa naging pagdalaw ni Chinese President Xi Jinping.
“What are the other deals with President Duterte and President Xi-Jin Ping? Kaya ang panawagan kung tayo ay natutulungan, we want the government to be transparent. So it can assure the public of what is going on,” ayon kay Fr. Secillano.
Ayon kay Father Secillano, tungkulin ng pamahalaan na ang mga naging kasunduan ay hindi lang para sa katiyakan ng ekonomiya ng bansa kundi maging ang pangangalaga sa pambansang interest, kasarinlan at seguridad ng bansa.
“Mahalagang magarantiyahan ng Gobyerno ang national interest natin at national security,” dagdag pa ng pari.
Agam-agam ng publiko ang mga posibleng maging kapalit ng mga proyektong popondohan ng China sa oras na hindi makapagbayad ng utang ang Pilipinas.
Una nang umapela ang Kanyang Kabanalan Francisco sa mga opisyal ng pamahalaan sa buong mundo na tutukan ang kabutihan ng mas nakakarami dahil ang pulitika sa pinakamataas na paraan ng pagtulong sa kapwa.
