690 total reads
Ikinalugod ni Father John Klen Malificiar, SSP –Project Coordinator ng Saint Paul National Bible Quiz (SPNBQ) ang patuloy na paglawak ng bunga ng taunang pagsasagawa nito.
Ayon sa pari, kakaibang kagalakan ang hatid sa kanila ng mga pagninilay na mula sa mga bata at mga guro na kalahok sa Bible quiz.
Aniya, isang tagumpay para sa mga pari at madre na nangangasiwa sa SPNBQ ang paglalim ng pananampalataya at paglawak ng ebanghelisasyon sa pamamagitan ng patimpalak na kanilang isinasagawa.
“Yung bible quiz ay hindi lang siya isang ordinary quiz, the quiz is about learning studying the word of God kaya kailangan ang challenge sa kanila is paano din sila magiging modelo sa kapwa nila estudyante sa mga schoolmates nila. Ito na yung tinatawag natin na effect ng evangelization, unquantifiable result ng bible quiz for the past 8 years.” pahayag ni Father Malificiar sa Radyo Veritas.
Kaugnay nito, pinasalamatan naman ni Evangeline Hertez – Coach ng Naga Parochial School sa Bicol Region ang SPNBQ dahil sa binhi ng ebanghelyo na naipupunla sa kanilang mga mag-aaral.
Ayon kay Hertez, ang Bible quiz ang nagsisilbing tagapaghubog ng mga kabataang lumalahok dito, upang maging responsableng mananampalataya na nagbabahagi din ng mga turo ng Panginoon sa kanilang kapwa kabataan.
“I’m thankful with the bible quiz kasi it becomes a formation to them, naisasabuhay ng mga bata kung ano yung napag-aaralan nila. Nagpapasalamat ako kasi it’s a kind of experience na hindi lahat [ng bata]nakakaexpereince, so I thank God for this gift. It is not just a contest it’s a mission God is asking you for something that you need to do.” pahayag ni Hertez sa Radyo Veritas.
Noong ika-25 ng Nobyembre, ginanap ang Battle of the Champions ng SPNBQ sa SM Mall of Asia Pasay City.
Mula sa 646 na grupong lumahok sa paligsahan ay natira ang labindalawang kupunan na nagtagisan para sa kampeonato.
Hinirang na kampeon ngayong taon ang Colegio Del Sagrado Corazon De Jesus na nagmula pa sa Western Visayas Region.
Ngayong 2018 ang ika-9 na taong pagsasagawa ng Saint Paul National Bible Quiz.
Hinihimok naman ni Father Malificiar ang iba pang mga paaralan at mga parokya na makiisa sa darating na ika-10 taon ng SPNBQ kung saan inaasahang gagawing mas espesyal ang paligsahan dahil na rin sa pagdiriwang ng Year of the Youth, at bilang paghahanda sa ika-500 anibersaryo ng Kristiyanismo sa Pilipinas sa 2021.
