425 total views
Kaisa ang Basilica Minore del Santo Niño de Cebu ng pamahalaan sa pagtiyak ng kaligtasang pangkalusugan ng mamamayan sa banta ng corona virus disease 2019.
Ayon kay Reverend Father Genesis Labana, OSA, ang director ng BMSN Media Center, pinaiigting ng basilica ang information drive upang maging bukas ang kamalayan ng publiko partikular ng mga deboto at turistang bumibisita sa Santo Niño at sa Magellan’s Cross na matatagpuan din sa Cebu.
“We are helping the Department of Health (DOH) in information drive against COVID 19 by posting their posters in all departments and strategic areas of the Basilica as well as the constant announcement in all our masses,” pahayag ni Fr. Labana sa Radio Veritas.
Nanatiling bukas sa publiko ang Basilica at patuloy din ang mga gawain nito ngayong kuwaresma at sa nalalapit na mga Mahal na Araw.
Inihayag ng Pari na ipinatutupad din sa Basilica ang pagtanggap ng komunyon sa kamay bilang pag-iingat na mahawaan ng virus.
Bukod dito, naglalagay rin ng mga alcohol at iba pang hygiene kits ang pamunuan sa lahat ng pintuan ng Simbahan lalo na sa kinaroroonan ng imahe ng Santo Niño kung saan pumipila ang mga deboto upang magnilay at magdasal.
Mahigpit ding ibinilin sa mga security personnel at iba pang kawani ng Basilica ang pagsusuot ng face masks na bahagi ng pag-iingat habang katuwang din ang kanilang medical team sa pagpapaliwanag sa publiko hinggil sa COVID 19.
“Our Medical Team will conduct a talk on COVID for the public,’ ayon kay Fr. Labana.
Ang Basilica ng Santo Niño sa Cebu ay isa sa mga simbahang dinadagsa ng mga deboto hindi lamang ng mga Filipino kundi maging ng mga dayuhan sapagkat isa ito sa kilalang debosyong bitbit ng mga Espanyol nang ipinakilala ang Kristiyanismo sa Pilipinas halos 500 taon na ang nakalipas.
Sa pinakahuling tala ng Deaprtment of Health umabot na sa 33 ang nagpositibo ng COVID 19 sa bansa kaya’t mahigpit na nagpatupad ang mga simbahan ng safety protocols alinsunod sa rekomendasyon ng DOH at iba pang mga eksperto.
