507 total views
July 24, 2020, 11:56AM
Umaasa ang obispo ng simbahang katolika na isang Pangulong Rodrigo Duterte na bilang lingkod ng bayan ang haharap sa publiko para sa ika-5 State of the Nation Address (SONA) sa Lunes, ika-27 ng Hulyo.
Inihayag ni Novaliches Bishop-emeritus Teodoro Bacani Jr. na bilang lingkod ng sambayanan ay nawa ihayag ng Pangulong Duterte ang tunay na kalagayan ng bansa lalu na ngayong pandemya.
“Huwag magpapakita ng dictatorial tendencies. At Harinawa, ay walang mura. Narinig ko si President Duterte noon, dinig na dinig ko sabi niya, ‘I have been humbled by this virus.’ Iyon ang gusto kong makita. Isang humble president na nagsasalita sa kanyang bayan bilang lingkod sa mga mamamayan, at hindi parang amo ng mga mamamayan,” ayon kay Bishop Bacani sa panayam ng Radio Veritas.
Hangad din ng obispo na mailahad ng pamahalaan ang mga programa upang tugunan ang kasalukuyang krisis at kung paano ibabangon ang bansa bilang isang bayan na nagkakaisa.
“Mga realistic measures para sa ganoon, ay makabangon tayo muli bilang isang bayan na nagkakaisa, hindi nagkakawatak-watak, at hindi winawatak-watak ng mga namumuno,” ayon kay Bishop BAcani.
Sa kabila nito, may agam-agam pa rin ang obispo na kabilang sa magiging talumpati ng pangulong Duterte ang pagpapatupad ng Anti-terrorism Law sa kabila ng kawalan ng implementing rules and regulations (IRR).
“Ano’ng inaasahan at kinatatakutan? Ang inaasahan ko’ng marinig sa lunes, sapagkat State of the Nation Address iyan, ay dapat naman talagang isiwalat ano ang kalagayan natin sa bansa? Iyong TOTOO. Walang palabok. Sabihin talaga kung ano ang nangyayari sa bansa, iyon ang inaasahan ko. Ikalawa, ang ikinatatakot ko na sabihin niya ay kung sasabihin ipaiiral na ang Terrorism Law kahit wala pang mga implementing rules and regulations.” Dagdag pa ni Bishop Bacani.
Una na ring nagpahayag ng pagtutol ang Catholic Bishops Conference of the Philippines sa pagpapatupad ng anti-terror law na sa ngayon ay may 13-petisyon nang isinumite sa Korte Suprema na kumukwestiyon sa legalidad ng batas.
