714 total views
ni: Reyn Letran at Marian Navales-Pulgo
Ito ang paanyaya ni Manila Apostolic Administrator Bishop Broderick Pabillo sa mananampalataya sa pagsisimula ng panahon ng adbiyento.
Ang adbiyento ay ang panahon ng paghahanda sa pagsilang ni Hesus na nagsimula ika-29 ng Nobyembre hanggang ika-24 ng Disyembre.
Ipinaliwanag ni Bishop Pabillo sa kabila ng novel coronavirus pandemic ay nabalam ang maraming gawain ng mga tao na nakaapekto rin sa ninanais nating lahat sa buhay.
“We can always see something good sa pangyayaring ito,” ayon kay Bishop Pabillo sa programang Pastoral visit on the air sa Radyo Veritas.
Iginiit ni Bishop Pabillo na bagama’t hanggang ngayon ay nanatiling banta ang pandemya, ay marami pa ring dapat ipagpasalamat sa Diyos ang sangkatauhan.
Ayon sa obispo, hindi katulad ng mga nagdaang adbiyento at Pasko, ngayon ay isang pagkakataon ng katahimikan na mabigyan tuon ang pagdarasal, pagninilay at tahimik na paghahanda na siyang diwa ng adbiyento bago ang pagdiriwang sa pagsilang.
Ipinagdarasal ng obispo na nawa sa ating paghihintay sa pagsilang ni Hesus ay ang paghahanda ng tahimik para sa ating kaligtasan.
Lalu na sa pangakong pagbabalik ni Hesus sa wakas ng panahon kung saan magiging ganap ang kaligtasan ng bawat isa.
“Huwag po tayong matakot sa wakas ng panahon kasi yan po yung kaganapan ng ating kaligtasan. Sinimulan na ni Hesus ang pagliligtas sa atin nung Siya ay namatay at muling nabuhay, ipinagpapatuloy ng simbahan ang gawain ng kaligtasan. Pero ang lahat ng ito ay magaganap sa wakas ng panahon,” dagdag pa ng obispo.
Dulot ng pandemya, umiiral pa rin ang iba’t- ibang community quarantine sa buong bansa bilang pag-iingat mula sa nakamamatay na sakit.
Hanggang ngayon ay nanatiling limitado ang paglabas ng mamamayan, gayundin ang pagpunta sa mga shopping malls, pasyalan at ang pagdalo ng mga gawaing simbahan sa mga Parokya.
Sa kabuuang tala, sa higit 63-milyong kaso ng nahawaan ng Covid-19, may 43-milyong katao na ang gumaling sa sakit habang higit sa isang milyong katao ang nasawi.
Sa Pilipinas naitala ang bilang ng kaso ng Covid-19 sa higit 420-libo, kabilang na ang may 400-libo na gumaling mula sa karamdaman.
