647 total reads
Kinundina ng isang opisyal ng Catholic Bishops’ Conference of the Philippines (CBCP) ang pag-apruba ng House Committee on Population and Family Relations sa Absolute Divorce Bill na inaasahan ring ipapasa sa plenary meeting ng mga mambabatas sa Mababang Kapulungan ng Kongreso.
Ayon kay Apostolic Vicariate of Taytay, Palawan Bishop Broderick Pabillo na siyang chairman ng CBCP-Episcopal Commission on the Laity, nakababahala ang ginagawang hakbang ng mga mambabatas na sa halip na palakasin pa ang pundasyon ng pamilya ay nais pa itong na pahinain at buwagin sa pamamagitan ng divorce law sa bansa.
“Noong nakaraang linggo nabalitaan natin na ang Committee on Population and Family Relations sa Lower House ay umaproba ng Absolute Divorce Bill at ito ay ipapasa na nila sa plenary meeting ng House of Representatives. Ito ay nakababahala kasi sa halip na palakasin ang pamilya ayon sa ating Saligang Batas, ang divorce ay nagpapahina sa pamilya. Ito ay napapatunayan na sa lahat ng mga bansa na may absolute divorce,” pagninilay ni Bishop Pabillo sa kanyang Misa sa Katedral ni San Jose Manggagawa sa bikaryato.
Ipinaliwanag ng Obispo na ang sakramento ng kasal ay hindi lamang isang malalim na tanda o kahulugan ng pagsasama ng mag-asawa sa halip ay nagbibihay ng katangi-tanging grasya o biyaya ng Diyos upang magampanan ng mag-asawa ang kanilang tungkulin sa pamilya.
Iginiit ni Bishop Pabillo na bagamat sadyang hindi madali at may ilang pagsubok na kahaharapin ang mag-asawa ay hindi naman imposible ang manatiling tapat at magsama hanggang sa kamatayan.
“Ang sakramento ay hindi lang tanda ng isang malalim na kahulugan. Ang sakramento ay nagbibigay ng grasya upang ang kanyang tinatanda ay matupad. Kaya ang ikinakasal sa simbahan ay may katangi-tanging grasya na binibigay ng Diyos sa mag-asawa upang magampanan nila ang kanilang tungkulin sa pamilya. Totoong mahirap ang buhay ng mag-asawa. Mahirap magsama hanggang kamatayan. Mahirap, pero hindi imposible, at ito ay napapatunayan ng maraming mga may-asawa. Mas maraming mga may-asawa na nananatiling tapat kaysa mga naghihiwalay. Ito ay makakayanan kasi may Diyos na nakataya sa kanilang pag-iisang dibdib at tinutulungan sila,” dagdag pa ni Bishop Pabillo.
Unang ikinadismaya ng CBCP – National Appellate Matrimonial Tribunal ang patuloy na pagsusulong ng mga mambabatas na maisabatas ang divorce sa Pilipinas.
Iginiit ng CBCP na hindi solusyon ang paghihiwalay o diborsyo sa mga problema at hindi pagkakaunawaan ng mag-asawa sa halip ay siyang magpapahina sa pundasyon ng pagkatao ng mga batang mayroong magkahiwalay na magulang.
