593 total reads
Umapela ng panalangin si Kalibo Bishop Jose Corazon Tala-oc para sa mga dinapuan ng coronavirus disease lalo na sa mga pari na nagpatuloy sa misyon ng Simbahan.
Sa liham ng Obispo, binigyang diin nito ang kahalagahan ng panalangin para sa mga pastol ng Simbahan na may mga karamdaman.
“I earnestly appeal to all of you to pray hard for our beloved priests who are presently experiencing difficult health conditions,” bahagi ng apela ni Bishop Tala-oc.
Ipinagdasal din ng Obispo ang katatagan ng bawat pamilya na sinusubok ng panahon bunsod ng COVID-19 at kagalingan sa lahat ng mga nahawaan ng virus.
Sa pinakahuling tala ng lokal na pamahalaan ng Aklan, nasa 163 ang aktibong kaso ng coronavirus sa lugar, mahigit sa dalawang libo ang gumaling sa karamdaman habang 103 naman ang nasawi.
Hinikayat din ni Bishop Tala-oc ang mananampalataya sa lugar na mahigpit sundin ang itinakdang health protocol upang maiwasan ang pagkahawa at makatulong sa kampanyang labanan ang paglaganap ng COVID-19.
Nagpasalamat naman ang Obispo ng Kalibo sa mga patuloy sumusuporta sa pangangailan ng mga lingkod ng simbahan at maging sa mga mamamayang nangangailangan ng kalinga ngayong panahon ng pandemya.
“I also thank you for your financial assistance to our sick priests. May the Lord continue to grant you many good things to be shared to those who are most in need,” ani Bishop Tala-oc.
Tiniyak ng Obispo ang patuloy na pakikiisa sa mahigit 70 mga pari ng Diyosesis na katuwang niya sa pamamahala sa mahigit kalahating milyong Katoliko sa lugar sa 24 na mga parokya.
