765 total views
Kapanalig, ang sitwasyon ng mga mangingisda nitong panahon ng pandemya ay hindi natin nabigyan ng sapat na atensyon. Hindi natin nakamusta ang mga small-scale fishermen na matagal nang nasa bulnerableng laylayan ng ating lipunan.
Ang mga maliit na mangingisda ay karaniwang pangalawa sa mga pinakamahirap na sektor sa ating bansa. Base sa datos ng Philippine Statistics Authorithy (2015), nasa 34% ang poverty incidence sa kanilang hanay.
Kasama rin sila sa naapektuhan ng pandemya. Naabala din sila ng mga mobility restrictions. Baka iniisip natin na sa karagatan, mas ligtas naman sa pandemya dahil open air. Kaya lamang kapanalig, hindi lamang sa pangunguha ng isda sa dagat nagtatapos ang kanilang trabaho. Kailangan din nila ibenta ito. Kung mahigpit ang quarantine, apektado din ang kanilang merkado. Mas dehado syempre dito ang mga mali-liit na mangis]ngisda, na minsan, sila pa mismo ang kailangang maglako ng sariling huli.
Ang pandemya ay isa lamang sa kanilang mga hamong kailangang harapin. Andyan na dati pa ang mga banta sa kanilang pinagkakakitaan, gaya ng mas madalas na kawalan ng huli, climate change, at siyempre, ang kaliitan ng kanilang kita.
Ayon sa opisyal na datos, ang volume o dami ng mga huli ng mga mangingisda sa ating bayan, komersyal man o maliitan, ay pababa na ng pababa. Tinatayang nasa limang kilo na lang ang huli ng mga maliliit na mangingisda kada araw, kumpara sa 50 kilos kada araw noong 1970s at 1980s. Overfished na rin kasi ang ating mga karagatan.
Ang climate change din kapanalig, ay malaki ang epekto sa buhay ng mga mangingisda. Ayon nga sa Food and Agriculture Organization (FAO), kapag tumaas ng 2 degrees ang temperatura ng mundo, halos 24% ang ibaba ng maximum catch potential o huli ng mga isda dito sa ating bayan pagdating ng 2050. Ang limang kilong huli ngayon kada araw, mababawasan pa. Paano na lamang ang mga ordinaryong mangingisda?
Kapanalig, kailangan ng protesyon ng ating mga maliliit na mangingisda. Ang kanilang kabuhayan ay nanganganib. Kailangan nating masiguro na resilient at matibay ang kanilang sektor. Nakasalalay dito hindi lamang ang kanilang pamilya, kapanalig, kundi ang sapat na food supply din ng ating bansa. Paalala ng Laudato Si, bahagi ng Catholic Social Teachings, na kailangan nating magbigay ng higit na atensyon sa pangangailangan ng dukha, ng mahina, at ng bulnerable, lalo pa’t lagi silang naiipit at nauungusan ng interes ng mga may kapangyarihan ngayon.
Sumainyo ang Katotohanan.
