1,013 total views
Ikinabahala ng academic community ng St. Scholastica’s College, Manila at ang Manila community ng Benedictine Sisters ang insidente kaugnay kay Dr. Natividad Castro na sapilitang inaresto ng San Juan City Police sa kanyang tahanan noong Biyernes ng umaga.
Ayon sa inilabas na pahayag ng institusyon, lubhang nakakagulat na akusahan si Castro, isang community health at human rights advocate, ng kidnapping at illegal detention gayong maganda naman ang layunin nitong tumulong at ipagtanggol ang karapatang-pantao.
“It is unjust that…one who has committed her life to give life to others, is now deprived of her right to life, a life that she has lived witnessing to Christ’s love and compassion,” ayon sa pahayag.
Giit ng institusyon na sa halip na akusahan ng pagiging kriminal, mas karapat-dapat na kilalanin at pahalagahan ng pamahalaan ang pag-aalay ng sarili ni Castro sa pagkalinga at pagtataguyod sa karapatan ng bawat Filipino lalo na ang mga higit na nangangailangan.
Mariin ding kinukundena ng St. Scholastica’s College ang patuloy na red-tagging ng pamahalaan at paglikha ng mga maling paratang sa mga inosenteng indibidwal.
“We demand that there be an immediate hearing of the case of Dr. Naty. We ask the Commission on Human Rights to show the falsity of the accusations against her and expedite her release,” ayon sa pahayag.
Si Castro o mas kilala bilang Dr. Naty ay isa sa mga alumni ng St. Scholastica’s College at nagtapos bilang Valedictorian sa highschool noong 1986.
Taong 2006 naman ng kinilala ito bilang isa sa 100 Outstanding Scholastican alumnae na ginawaran ng Centennial Award ng St. Scholastica’s Alumnae Foundation, Inc. dahil sa kanyang hindi matatawarang pagmamalaskit at pagtulong lalo na sa mga mahihirap na magsasaka, mangingisda at mga katutubong Lumad sa Caraga Region sa Mindanao.
Samantala, dalangin naman ng institusyon ang kaligtasan ni Castro, gayundin ang panawagan ng pagkakaisa upang suportahan at matiyak ang agaran nitong paglaya laban sa kamay ng mga militar.
Ang ‘Statement of Concern’ ay nilagdaan nina Sr. Mary Christine Pinto, OSB, pangulo ng St. Scholastica’s College; at Sr. Mary John Mananzan, OSB, Superior ng Manila Community of Benedictine Sisters.
