715 total views
Kinundena ni Cabanatuan Bishop Sofronio Bancud ang talamak na smuggling ng mga agricultural products na pinapahina ang lokal na industriya ng pagsasaka sa Pilipinas.
Kasunod ito ng senate hearing kung saan tinalakay ang suliraning kinakaharap ng ibat-ibang lokal na samahan ng mga magsasaka at suppliers ng mga gulay bunsod ng smuggling.
” Nakalulungkot na sa napakarami at napakalawak na mga pangyayaring nagdudulot ng walang katapusang kahirapan sa ating pamayanan ay nadadagdagan na naman ng bagong pagpapahirap dulot ng SMUGGLING ng mga agricultural products, nakalulungkot at nakapanghihina ng loob ang mga ganitong walang katapusang gawain na mga sakim at ganid nating mga kababayan,” ayon sa mensaheng ipinadala ng Obispo sa Radio Veritas.
Ayon sa Obispo, naway iwaksi ang anumang katiwalian at pagiging makasarili ng mga opisyal sa pamahalaan pamahalaan upang tunay na mapairal ang mga batas laban sa smuggling.
Nanindigan si Bishop Bancud na dapat ding pananagutin ang lahat ng sangkot at dahilan kung paano nakapasok ang mga smuggled products sa bansa.
“Ang talagang kinakailangan natin ay ang TOTOO AT MASIGASIG NA PAGSASAKATUPARAN ng mga batas na ito. Ngunit ang nakalulungkot at malaking problema natin ay ang mga inatasang magpatupad nito ay mas madalas na may kinikilingan. Once and for all, PANAGUTIN ANG LAHAT NG MGA SANGKOT sa smuggling na ito as well as the many other crimes that are perpetuated by those in power,” ayon pa sa Obispo.
Dismayado rin si Bishop Bancud sa kakulangan ng mga hakbang ng mga Party-list Representatives na magsilbing boses ng kanilang mga kinakatawang sektor ng lipunan katulad ng sektor ng agrikultura.
Umaasa ang Obispo na hindi makalimutan ng mga partylist na maging boses sa pamahalaan ng kanilang mga kinakakatawan na sektor higit na ngayong nararanasan ang ibat-ibang suliranin bunsod ng pandemya.
“Yung ating mga Party List Representatives na may nasasakupang sector ng lipunan na nangakong paglingkuran sila tulad ng mga farmers, fishermen, merchants, at marami pang iba, pinakikinggan kaya nila ang TOTOONG HINANAING ng kanilang mga nasasakupan? Do they honestly and sincerely listen to the actual situation and experience of their constituents and NOT simply deal with issues only from their limited and self-directed perception?,” pagbibigay diin pa ni Bishop Bancud.
