858 total views
Hindi pa rin nabibigyang-linaw ang motibo sa pagkawala ni Father Leoben Peregrino na natagpuang buhay matapos ang dalawang araw sa Silang, Cavite.
Ayon kay Rosario, Cavite Police acting chief Police Lieutenant Colonel Ruther Saquilayan, kanilang tinitingnan ang motibo sa pagdukot kay Fr. Peregrino.
Iginiit naman ni Saquilayan na tanging ang pari lamang ang makakapaglahad ng mga tunay na nangyari ngunit hindi pa rin ito makausap dahil sa tinamong trauma.
“‘Yun po ang initial [investigation] namin na ginagawa kung meron man na abduction na nangyari kay Father [Peregrino]. Bale sa ngayon po talaga ay wala pong makakapagbigay ng tunay na pangyayari kundi po si Fr. Leoben lang po,” ayon kay Saquilayan sa panayam sa Veritas Pilipinas.
Sa kasalukuyan ay hinihintay pa rin ng pulis ang rekomendasyon ng doktor ni Fr. Peregrino upang ito ay makausap at mahingan ng impormasyon hinggil sa pangyayari.
Si Fr. Peregrino o mas kilala bilang Fr. Phem, ang kasalukuyang rektor at kura paroko ng Diocesan Shrine and Parish of Our Lady of The Most Holy Rosary – Reina de Caracol sa Rosario, Cavite na saklaw ng Diocese of Imus.
Patuloy rin ang pakikipag-ugnayan ng mga pulis sa mga lugar na dinaanan ng pari upang makapangalap ng mga ebidensiyang susuporta sa imbestigasyon.
“May mga kinakalap po kaming mga witness sa lugar ng pinangyarihan at patuloy po naming bina-backtrack po ‘yung mga CCTV cameras simula po dito sa Rosario Parish papunta po doon sa pinangyarihan kung saan po siya natagpuan,” pahayag ni Saguilayan.
Nawawala si Fr. Peregrino noong April 1 at natagpuan makalipas ang dalawang araw sa loob ng sasakyan na walang malay at nakagapos ang mga kamay at leeg sa Barangay Lumil, Silang, Cavite.
Kasalukuyan nang ligtas at nagpapahinga si Fr. Peregrino sa isang ospital sa Dasmariñas, Cavite.
