803 total reads
Layunin ng Diyosesis ng Romblon na makapagpatayo ng 1000 bahay para sa mga mahihirap na pamilya na higit na apektado ng krisis at iba’t ibang sakuna sa lalawigan ng Romblon.
Ayon kay Romblon Diocesan Social Action Director Father Ric Magro, layunin ng proyekto na bigyan ng maayos at matibay na bahay ang mga mahihirap na pamilya lalo na ang mga nakatira sa tabing-dagat na mas malapit sa panganib kapag may sakuna.
“Nakikita kasi noon na ang nililipat kaagad natin ay ‘yung mga nakatira sa tabing dagat, ‘yung mga pamilyang mga barong-barong lamang ang bahay. Kaya’t sa ngayon na wala pang bagyo, hinahanapan kaagad natin ng paraan sila kung paano natin sila matutulungan na hindi na aabutin pa ng bagyo,” pahayag ni Fr. Magro sa panayam ng Radio Veritas.
Pagbabahagi ni Fr. Magro na binabalak ng diyosesis na makapagbahagi ng tig-50 bahay sa 17 bayan ng Romblon.
Sa kasalukuyan, nasa ikatlong bahagi na ang proyekto ng diyosesis kung saan sa una at ikalawang bahagi ay umabot na sa 100 mga bahay ang naipatayo at naipamahagi sa mga residente ng Tablas at Romblon Island.
“Sa ngayon ay patuloy tayong nagpapagawa again sa Tablas Island ng another 50 houses. at ang target natin ay makapagbigay tayo sa lahat ng munisipyo kahit tig-50 houses muna,” ayon kay Fr. Magro.
Nagpapasalamat naman ang Diyosesis ng Romblon sa NASSA/Caritas Philippines at Couples for Christ – Answering the Cry of the Poor (CFC-ANCOP) sa patuloy na pagtulong at pagsuporta sa mga adhikain ng diyosesis na bigyan ng matibay na tahanan ang mga mahihirap na pamayanan.
Magugunita noong 2015 nang labis na napinsala ng Bagyong Nona ang diyosesis kung saan umabot sa 4,000 pamilya ang nawalan ng mga tahanan at kabuhayan.
Tinatayang aabot sa walo hanggang 12 bagyo ang dumadaan sa Romblon sa loob ng isang taon.
