429 total views
Patuloy na gawing ehemplo ang kabanal-banalang puso ng Panginoong Hesus Kristo.
Ito ang pagninilay ni Manila Archbishop Jose Cardinal Advincula sa kaniyang pangunguna sa misa ng kapistahan ng Sacred Heart Parish, Sta. Mesa, Manila.
Umaasa si Cardinal Advincula na laging alalahanin ng bawat mananampalataya na naging daan ang pag-aalay ni Hesus ng buhay upang manumbalik ang koneksyon ng Panginoong Diyos sa sangkatauhan.
“Ang buwag na biyayang hiling natin sa kaniya ay maihulma niya ang ating puso sa wangis ng kaniyang puso, sa udyok ng Santo Papa, Papa Francisco na bigyang tuon at isabuhay ang synodality sa simbahan o ang sama-samang paglalakbay ng bayan ng Diyos patungo sa kaniyang kaharian makakatulong na pagmunihan ang mga katangian at layon ng banal na puso ni Hesus.” pagninilay ni Cardinal Advincula
Tinukoy nito ang sugatan at duguang puso ni Hesus na nababalot ng koronang tinik sa mga imahen ng ‘Sacred Heart’ ay simbolo ng kaniyang patuloy na pagmamahal sa tao sa kabila ng mga natanggap na pagtataksil at pagtatakwil.
Habang sinisombolo naman ng nagliliyab na puso ni Hesus ay ang tanda ng kaniyang walang kapaguran na pagnanais na makapagturo at makatulong sa sanlibutan gamit ang salita ng Diyos.
“Iba ang matematika ng tunay na pagmamahal ni Hesus, hindi nababawasan kungdi mas umiigting ang pagibig niya sa atin sa mga pagkakataong tayo ay nawawala, malalayo, nanghihina at napipilayan kapag naman tayo ay matagpuan siyay nagdiriwang at inilalagay tayo sa kaniyang balikat upang muling mahagkan at muling ilapit sa kaniyang puso,” mensahe pa ng Arsobispo.
“Ito ang ika-106 na taon na pagdiriwang ng Sacred Heart Parish sa Santa Mesa Manila na itinatag noong 1911 bilang kauna-unahang simbahan na itinalaga para sa Banal na Puso ni Hesus sa Pilipinas.”
Sa susunod na taon ay gugunitain din ng parokya ang ika-120 taon ng pagdating sa Pilipinas ng imahen ng Sacred Heart of Jesus.