235 total views
Tiniyak ng Arnold Jannsen Kalinga Foundation – Program Paghilom ang patuloy nna pag-agapay sa mga pamilyang naiwan ng mga biktima ng ng extrajudicial killings (EJK) dahil sa marahas na War on Drugs ng nakalipas na administrasyong Duterte.
Ito ang tiniyak ng Program Paghilom na itinatag ni Divine Word Missionary Priest at 2025 Ramon Magsaysay Awardee Fr. Flaviano “Flavie” Villanueva SVD sa isinagawang seremonya ng turn-over sa mga cremated remains ng dalawang biktima ng EJK sa kanilang pamilya kasabay ng anibersaryo ng pag-aresto kay dating Pangulong Rodrigo Duterte noong ika-11 ng Marso, 2026.
Ayon sa Program Paghilom, ang nasabing araw na ito ay paalala na ang paghahanap ng hustisya para sa mga biktima ay mahalagang bahagi ng paghilom ng kanilang mga pamilya at ng patuloy na pag-alala at paggalang sa buhay ng bawat biktima.
Tiniyak din ng Program Paghilom ang pagtulong sa mga pamilyang naapektuhan ng karahasan sa pamamagitan ng pag-agapay, pagkakaloob ng psychosocial assistance, at paglaalaan ng maaayos at may dignidad na himlayan sa mga nasawing biktima ng EJK.
“Program Paghilom will continue to support families affected by past violence through accompaniment, memorialization, and psychosocial assistance. By preserving the memory of victims and assisting families, the program seeks to help communities move toward healing while maintaining a commitment to truth and justice.”
Bahagi ng mensahe ng Program Paghilom.
Una ng inihayag ni Fr. Villanueva na layunin ng kauna-unahang EJK Memorial Site na tinaguriang Dambana ng Paghilom na mabigyan ng dignidad at pagpapahalaga ang lahat ng mga biktima ng EJK sa pamamagitan ng pagkakaroon ng isang naaangkop na himlayan at huling hantungan para sa mga nasawi sa marahas na implementasyon ng war on drugs ng nakalipas na administrasyong Duterte.
Sa kasalukuyan may mahigit sa 300 ang bilang ng mga pamilyang kinakalinga ng Program Paghilom ng Arnold Janssen Kalinga Foundation.
