585 total reads
Binigyang-diin ni Federation of Asian Bishops’ Conferences President, Felipe Neri Cardinal Ferrao, na ang pagbabago ng klima ay hindi lamang usapin ng kalikasan kundi isang malalim na hamong moral at espiritwal.
Ayon sa kardinal, ramdam sa Asya ang malawakang epekto ng krisis sa klima, mula sa tumataas na dagat at natutunaw na mga glacier, hanggang sa mas matitinding bagyo, baha, at heatwave, na nag-iiwan ng mga komunidad na nawawalan ng tahanan, pagkain, at malinis na tubig, habang lalo pang lumalala ang kahirapan.
“The climate crisis is not only an environmental issue. It is a question of justice, human dignity, and care for our common home… Those who suffer most must be placed at the center of any response,” pahayag ni Cardinal Ferrao.
Igiiniit ng pangulo ng FABC na ang Asya, na tahanan ng higit sa kalahati ng populasyon ng mundo, ay ang pinakamapanganib na rehiyon laban sa iba’t ibang sakuna at kalamidad.
Inihalimbawa ni Cardinal Ferrao ang coastal at delta areas sa Bangladesh, Vietnam, Pilipinas, at Indonesia, na nahaharap sa mabilis na pagtaas ng dagat at pag-urong ng lupa, habang ang pag-urong naman ng mga glacier sa Hindu Kush at Tibetan Plateau ay nagpapataas ng panganib ng baha at kakulangan sa tubig dulot ng pag-init ng kapaligiran.
Gayunman, binigyang-diin ng kardinal na ang Asya ay puno rin ng pag-asa, kung saan halos kalahati ng bagong renewable energy capacity sa buong mundo ay nagmumula sa kontinente.
Binigyang-pansin ni Cardinal Ferrao ang antas ng lokal na komunidad, kung saan isinusulong ang pagpapanumbalik at pangangalaga sa kapaligiran, na madalas ay pinangungunahan ng mga katutubong kababaihan.
“At the grassroots level, communities are restoring mangroves, managing watersheds, and practicing agroecology—often led by women—strengthening resilience while honoring local and Indigenous knowledge,” saad ni Cardinal Ferrao.
Kaisa ng FABC at ng mga simbahan sa Global South, mariing nanawagan ang kardinal sa mga pamahalaan, institusyon at mamamayan na kilalanin na ang krisis sa klima ay pangunahing usapin ng katarungan, dignidad ng tao, at pangangalaga sa nag-iisang tahanan.
“One that demands solidarity with the most vulnerable and a path of hope and conversion,” ayon kay Cardinal Ferrao.
