381 total views
Mga Kapanalig, nang inilarawan ni Hesus sa Kanyang mga alagad ang paghuhukom—isang yugtong mababasa natin sa Mateo 25:31-45—sinabi niya: “Tandaan ninyo, nang pagkaitan ninyo ng tulong ang isa sa mga pinakahamak, ako ang inyong pinagkaitan.” Kasama sa mga binanggit Niyang pinakahamak ay ang mga dayuhan. “Sapagkat ako’y isang dayuhan at inyong pinatulóy,” sasabihin ng Anak ng Tao sa mga nasa kanan ng kanyang trono.
Oktubre noong isang taon nang hilingin ng Estados Unidos na pansamantalang tanggapin ng Pilipinas ang mga refugees mula sa bansang Afghanistan. Kung inyong matatandaan, bumalik sa kapangyarihan ang Taliban sa Afghanistan matapos umatras doon ang tropang Amerikano noong 2021. Ang Taliban ay kilala sa kanilang istriktong interpretasyon ng Sharia law na sanhi naman ng paglabag sa mga karapatang pantao lalo na ng mga babae.
Ang hiling ng gobyernong US sa ating pamahalaan: patirahín muna rito ang nasa 50,000 Afghans sa loob ng hindi bababa sa dalawang buwan. Ang mga Afghans na ito ay mga dating empleyado ng gobyernong US, at ang pagtira nila sa Pilipinas, kung sakaling matutuloy, ay habang pinoproseso ang special immigrant visas upang makapasok naman sa Amerika. Sasagutin daw ng Amerika ang magiging gastos ng mga refugees katulad ng kanilang pagkain at tirahan.
Sa isang pagdinig ng Senado noong nakaraang buwan, may mga mambabatas tayong nagdadalawang-isip sa hiling na ito ng Amerika. Hindi raw kaya magiging espiya ng Amerika ang mga refugees? Tanong iyan ng kapatid ni Pangulong BBM na si Senadora Imee Marcos. Para naman sa National Bureau of Investigation at National Intelligence Coordinating Agency, maaaring maging banta ang mga dayuhan sa ating seguridad, lalo na sa mga lugar na maraming Muslim. Baka may mahalo raw na mga terorista sa mga refugees na nais ng Amerika na papasukin sa ating bansa. Mas matigas naman ang pagtutol ni Vice President Sara Duterte. Mistulang panghihimasok daw ang gustong mangyari ng Amerika sa ating kapangyarihang piliin kung sinu-sino ang mga pwedeng pumasok sa Pilipinas.
Nakalulungkot ang mga pahayag na ito, lalo na’t mayroon tayong mahabang kasaysayan ng pagkupkop sa mga dayuhang dahil sa giyera at pag-uusig ay nais umalis sa kanilang lupang sinilangan. Noong World War II, tumanggap tayo ng mahigit sanlibong Jewish refugees. Noong dekada ’70 naman, tinanggap natin ang mga tinaguriang “boat people” mula sa Vietnam na nais takasan ang giyera doon. Nasa mahigit 400,000 na refugees ang kinupkop noon ng Pilipinas. Mula 2017 naman, nagsimulang tumanggap ang ating bansa ng mga Rohingya refugees na pinagmamalupitan ng gobyerno ng Myanmar. Naging santuwaryo ng mga dayuhang ito ang ating bansa, at marami nga sa kanila ang nagkaroon na rito ng tahanang matatawag.
Habang isinusulat natin ang editoryal na ito, wala pa ring pormal na sagot ang ating pamahalaan sa hiling Amerika. Hindi maiiwasang may mag-alalá para sa ating seguridad. Hindi rin masisisi ang mga nagsasabing ginagawa tayong kasangkapan ng Amerika para sa kaguluhang sila mismo ang nagsimula sa Afghanistan. Hindi rin daw ba pagkukunwari ang pagtanggap sa mga refugees gayong dito mismo sa atin, may mga kababayan tayong hindi tinatanggap ng kanilang kapwa?
Matapos ang pagbabalik sa kapangyarihan ng Taliban, nanawagan noon si Pope Francis sa mga bansang pagbuksan ng pinto ang mga Afghans na naghahanap ng kanlungan. Ito ay panawagang nagmumula sa pagpapahalaga ng ating Simbahan sa dignidad ng tao, sa kapayapaan, at sa pagkakapatiran.
Mga Kapanalig, ipagdasal nating maliwanagan ang ating mga lider sa usaping ito. Makita sana nila ang pangangailangan sa madaliang pagkilos upang tulungan ang mga dayuhang nais lamang magkaroon ng matiwasay na pamumuhay. Maging instrumento sana tayo ng pagtataguyod ng dignidad ng tao, kahit pa ng mga dayuhan.
Sumainyo ang katotohanan.
