30,363 total reads
Nanawagan si Rev. Fr. Jerome Secillano, Rector ng National Shrine of Mary Queen of Peace o mas kilala bilang EDSA Shrine, sa mga kabataan na mas kilalanin at unawain ang mahalagang papel ni Manila Archbishop Jaime Cardinal Sin sa kasaysayan ng bansa.
Ito ang bahagi ng mensahe ni Pari kaugnay sa nakatakdang paggunita ng ika-40 anibersaryo ng EDSA People Power Revolution.
Ayon kay Fr. Secillano, maaaring hindi nagkaroon ng People Power noong 1986 kung hindi dahil sa matatag at moral na pamumuno ni Cardinal Sin na gumabay sa sambayanan sa gitna ng magulong taon ng diktadura.
“We want the young people to know Cardinal Sin. Perhaps, there wouldn’t be a People Power in 1986 if not for his steadfast and moral leadership that guided the nation in those tumultuous years of dictatorship.” pahayag ni Fr. Secillano.
Bagamat may iba pang mga personalidad na naging bahagi ng 1986 People Power Revolution, binigyang-diin ni Fr. Secillano na naging makapangyarihan ang tinig ng dating Arsobispo ng Maynila nang manawagan siya sa mga Pilipino na magtungo sa EDSA noong Pebrero 22, 1986 sa pamamagitan ng himpilan ng Radyo Veritas.
Dahil sa pagtugon ng taumbayan sa panawagan ni Cardinal Sin, Pebrero 25, 1986 ay napatalsik at nawakasan ang rehimen ni dating Pangulong Ferdinand Marcos Sr. sa pamamagitan ng mapayapang pagkilos ng mga mamamayan sa lansangan.
“Yes, there were other actors involved in the 1986 People Power Revolution, but his voice loomed large when he called on Filipinos to troop to Edsa on that fateful day of Feb. 22. The nation obeyed and a dictator was ousted on Feb. 25, 1986. Join us in this Symposium to honor the man, Jaime Cardinal L. Sin, D.D., former Archbishop of Manila.” Dagdag pa ni Fr. Secillano.
Kaugnay nito, inaanyayahan ng pamunuan ng EDSA Shrine ang lahat na makiisa sa gaganaping Symposium on The Life and Legacy of Sin bilang pagpupugay sa buhay at pamana ni Cardinal Sin na isang lider ng Simbahan na nagsilbing tinig ng budhi ng bayan sa isang mahalagang yugto ng ating kasaysayan.
Nakatakda ang Symposium on The Life and Legacy of Sin sa ika-24 ng Pebrero, 2026 ganap na alas-kwatro ng hapon kung saan magsisilbing tagapagbahagi sina Rev. Msgr. Gerardo Santos at Rev. Fr. Francis Gustillo, SDB.
