82,739 total views
Inatasan ni Pangulong Ferdinand Marcos Jr. ang Kongreso na unahin ang pagpasa ng apat na pangunahing panukalang batas na nakatuon sa reporma at pagpapalakas ng transparency sa pamahalaan.
Sa pulong ng Legislative-Executive Development Advisory Council (LEDAC) ngayong umaga, binigyang-diin ng Pangulo na dapat agarang suriin at tuguan ng Kamara at Senado ang mga sumusunod na panukala:
Anti-Dynasty Bill
Independent People’s Commission Act
Party-list System Reform Act
Citizens Access and Disclosure of Expenditures for National Accountability (CADENA) Act
Ayon sa Pangulo, mahalagang masuri at maipasa ang mga panukalang ito sa lalong madaling panahon upang mapatibay ang good governance at pananagutan ng pamahalaan.
Dumalo sa pulong si Senate President Vicente Sotto III, House Speaker Faustino Dy III, Majority Leader Sandro Marcos, at iba pang lider ng Kongreso.
Napagkasunduan rin sa LEDAC ang timeline para sa pagpasa ng General Appropriations Bill at ang pagsusumite ng enrolled bill para sa paglagda ng Pangulo.
Layunin ng administrasyon na itaguyod ang higit pang transparency, accountability, at makabuluhang reporma sa pamahalaan.
