1,011 total views
Hinimok ni Nueva Segovia Archbishop David William Antonio ang bagong inordinahang si Urdaneta Bishop Nick Argel Vaquilar na pamunuan ang Simbahan bilang isang pastol na ganap na nakatalaga kay Hesukristo, nakaugat sa panalangin, at handang makinig at makilakbay kasama ang sambayanan ng Diyos.
Tiniyak naman ng bagong obispo ang kanyang buong pagtugon sa tawag ng Panginoon, sa kabila ng pakiramdam niyang hindi siya karapat-dapat sa tungkulin.
Ito ang mensahe ng arsobispo sa episcopal ordination ni Bishop Vaquilar na ginanap sa Saint Augustine Parish–Archdiocesan Shrine of Our Lady of Charity sa Bantay, Ilocos Sur, kung saan binigyang-diin ni Archbishop Antonio na ang pagiging obispo ay hindi nagsisimula sa awtoridad kundi sa pagiging alagad ni Kristo.
Ayon sa arsobispo, ang napiling episcopal motto ni Bishop Vaquilar na “Domine, Tuus Sum” o “Lord, I am Yours” ay sumasalamin sa ganap na pagsuko ng sarili sa Panginoon, na pundasyon ng tunay na paglilingkod bilang pastol ng Simbahan.
“Before a bishop belongs to a diocese, he belongs first of all to Jesus Christ. Before he can shepherd others, he must first be a disciple who has learned to declare every day of his life: Domine, Tuus Sum—’ Lord, I am Yours,’ ayon kay Archbishop Antonio.
Paliwanag ng arsobispo na ang malawak na karanasan ni Bishop Vaquilar bilang seminary formator ay naghanda sa kanya upang maging unang tagapaghubog ng lokal na Simbahan sa pamamagitan ng paggabay sa mga pari, relihiyoso, pamilya, kabataan at lahat ng mananampalataya.
Kasabay nito, iginiit ni Archbishop Antonio na ang isang obispo ay dapat mamuno ayon sa diwa ng synodality, isang Simbahang naglalakbay nang magkakasama.
“The bishop in a synodal Church does not walk ahead as one who possesses all the answers, nor walk behind as one reluctant to lead. Rather, like the Risen Lord on the road to Emmaus, he walks with God’s people—listening before speaking, discerning before deciding, teaching without ceasing to learn, and leading while remaining a fellow pilgrim,” dagdag ng arsobispo.
Binigyang-diin din ng arsobispo na ang pangunahing tungkulin ng isang obispo ay manatiling malapit sa Diyos.
“The bishop’s first ministry is not administration; his first ministry is contemplation,” dagdag pa ni Archbishop Antonio.
Dagdag pa ni Archbishop Antonio, nararapat lamang na ang bawat pasya ng mga pastol ng Simbahan ay nagmumula sa panalangin at sa Ebanghelyo.
Paalala rin ng arsobispo na ang isang obispo ay hindi tinatawag upang maghari kundi upang maglingkod.
“The bishop is not called to own the Church, but to serve her. He is called not to dominate, but to accompany. He is called not to create followers or loyalists for himself, but to form disciples for Jesus Christ,” paliwanag ng arsobispo.
Aniya, ang tunay na pamumunong Kristiyano ay nakaugat sa pagmamahal kay Kristo at hindi lamang sa kakayahan o awtoridad.
Samantala, sa kanyang mensahe, ibinahagi ni Bishop Vaquilar ang kanyang personal na pagninilay hinggil sa salitang Ilokanong “wen” o “oo” na madalas napapalitan sa kanyang cellphone ng salitang “when”, na naging inspirasyon sa kanyang pag-unawa sa kanyang bokasyon.
Ayon sa obispo, natutuhan niyang ang Diyos ang naghahanda sa mga taong Kanyang tinatawag.
“He does not choose us because we are capable. He makes us capable because He has chosen us,” ayon kay Bishop Vaquilar.
Inilarawan ni Bishop Vaquilar ang simpleng karanasan bilang paalala na huwag hayaang mapalitan ng pag-aalinlangan ang ganap na pagtugon sa Panginoon.
“Perhaps this little autocorrect mistake is a spiritual reminder for me not to allow my ‘yes’ to become a ‘when,’ not to postpone generosity, trust, or surrender to the Lord,” aniya.
Binigyang-diin ni Bishop Vaquilar na ang paglilingkod bilang obispo ay nakasalalay sa ganap na pagtitiwala sa Diyos.
Tiniyak din ng bagong pastol ang kanyang buong pagtanggap sa misyong ipinagkaloob sa kanya para sa Diocese of Urdaneta kasabay ng kahilingang ipanalangin ang pagsisimula ng kanyang mga gawaing pagpapastol sa diyosesis.
“The Diocese of Urdaneta is now my home. I go not because I am worthy, but because God has called me. Please pray for me. Pray that every day of my episcopal ministry I may continue to say ‘wen,’ and never ‘when,’ to the Lord,” dagdag ng bagong obispo.
Pinangunahan ni Cotabato Archbishop Emeritus Cardinal Orlando Quevedo ang ordinasyon, katuwang sina Nueva Segovia Archbishop Marlo Peralta at Urdaneta Bishop Emeritus Jacinto Jose.
