56,437 total reads
Puno ng pasasalamat at pag-asa si Fr. Felmar Castrodes Fiel, SVD sa pagsisimula ng kanyang bagong tungkulin bilang General Manager ng Radio Veritas Asia (RVA).
Ito ang kanyang mensahe matapos maitalaga sa posisyon noong August 5, sa ilalim ng appointment na nilagdaan ni Manila Archbishop Jose Cardinal Advincula, chairman ng Philippine Radio Educational and Information Center Inc. (PREIC), at ni San Pablo Bishop Marcelino Antonio Maralit, chairperson ng Office of Social Communication ng Federation of Asian Bishops’ Conferences (FABC).
“As I begin this new mission as General Manager of Radio Veritas Asia, I carry gratitude and hope,” pahayag ni Fr. Fiel sa Radyo Veritas.
Aminado ang pari na mahirap iwanan ang Cebu, kung saan siya naglingkod sa radio ministry nang 11 taon at higit na nahubog ang kanyang bokasyon. Gayunman, buong loob na tinatanggap ang panibagong yugto ng paglilingkod.
“Leaving Cebu, where I spent 11 years in radio ministry, was difficult, and my heart was deeply formed. Yet, I am also happy to embrace this new journey that opens new possibilities for my personal growth and widens my horizons in the service of the Church,” ani Fr. Fiel.
Batid ng pari na kaakibat ng kanyang tungkulin ang malaking hamon lalo na sa larangan ng new evangelization sa gitna ng mabilis na pagbabago ng teknolohiya.
“In this digital age, the call to new evangelization through media is both a challenge and a gift. Amid the many voices of today’s world, I renew my commitment to tell the story of Christ,” giit niya.
Si Fr. Fiel ay tubong Kiblawan, Davao del Sur. Nagtapos siya bilang magna cum laude ng Master of Arts in Theology sa Divine Word Seminary sa Tagaytay City at kumuha rin ng Master of Science in Development Communication sa University of the Philippines Los Baños.
Naordinahang pari ng SVD noong 2008 at naglingkod sa iba’t ibang misyon ng kanilang kongregasyon lalo sa mga parokya sa Zamboanga Sibugay at radio ministry sa Cebu sa pamamagitan ng Word Broadcasting Corporation. Nagsilbing Assistant General Manager mula 2014 hanggang 2020 at General Manager mula 2020 hanggang sa kanyang pagtatalaga sa RVA.
Bukod dito, nagtuturo rin ang pari ng broadcasting journalism, at development communication sa University of San Carlos, Cebu at Holy Name University, Bohol.
Kilala rin si Fr. Fiel sa kanyang community-building efforts, kabilang ang pag-organisa ng world’s longest biko (sticky rice) event sa Mabuhay, Zamboanga Sibugay, na nagbuklod sa mga Muslim, Kristiyano, at mga Subanen. Aktibo rin ito online sa pamamagitan ng kanyang blog at mga pagninilay sa social media.
Kabilang sa kanyang mga parangal ang Excellence in Vocation Promotion Award (2012), Best Blog Award mula sa 2017 Catholic Mass Media Awards, at Inspiring Religious Leader in Media Award mula sa 2023 International Golden Globe Achievers Awards.
Itinatag ng FABC ang Radio Veritas Asia noong 1969 bilang shortwave radio station na nagsasahimpapawid ng mga pagninilay at katesismo sa iba’t ibang lengwahe sa Asya, partikular sa mga bansang may mahigpit na patakaran sa relihiyon.
Hahalili si Fr. Fiel kay Claretian Fr. Victor Sadaya, na nagsilbing GM ng RVA mula 2016. Pormal siyang magsisimula sa kanyang tungkulin sa September 1, 2025.
