1,324 total views
Hinamon ng Sanlakas Philippines ang mga pinuno at kinatawan ng iba’t ibang bansang dumalo sa COP27 at G20 Summit na manindigan para sa ikabubuti ng daigdig sa gitna ng nagaganap na climate at economic crisis.
Ayon kay Sanlakas secretary-general Atty. Aaron Pedrosa, dapat manindigan ang mga kalahok na bansa para sa mabilis, makatarungan, at pantay na paglipat sa 100 porsyentong renewable energy systems at low carbon development.
“We need real solutions to climate change and the multiple crises we are facing. The time is now to address the root cause of the problem, instead of pushing for false solutions that extend the life of fossil fuels,” pahayag ni Pedrosa.
Patuloy ang operasyon ng mga coal-fired at liquified natural gas (LNG) power plant sa Pilipinas na nagdudulot ng panganib sa kalikasan at kalusugan ng mga tao.
Sa kabila nito, mariing isinusulong ng iba’t ibang grupo ang paggamit at pagsuporta sa renewable energy dahil sa kakayahan nitong mapababa ang presyo ng kuryente at matiyak ang kaligtasan ng mga tao.
Samantala, panawagan naman ni Philippine Movement for Climate Justice national coordinator Ian Rivera na ihinto na ng mga mayayamang bansa, financial institutions at korporasyon ang pagpopondo at pagsuporta sa mga fossil fuel projects.
“We really have to end fossil fuels now. There must be no more new oil, gas or coal if we are to save humanity. Shift those financing to clean energy,” ayon kay Rivera.
Si Pedrosa at Rivera ay kapwa dumalo sa COP27 Summit sa Sharm El Sheikh, Egypt bilang kinatawan ng mga environmental, labor, at human rights group ng Pilipinas upang ipahayag ang mga panawagan para makamtan ang katarungang pangklima at ekonomiya ng bansa at buong mundo.
