1,699 total reads
Itigil na ang karahasan at paniniil sa mga Labor Unions sa bansa.
Ito ang panawagan kay Pangulong Ferdinand Marcos Jr. ni Lito Ustarez, Vice Chairperson ng Kilusang Mayo Uno (KMU), sa paggunita ng Global Day of Action Against Trade Union Repression ngayong araw.
Ayon kay Ustarez, patuloy na nararanasan ng mga labor leaders at trade union members ang paniniil mula sa pamahalaan at mga mapagmalabis na malalaking kompanya.
“Apektado ang trabaho, seguridad, at pamilya ng mga biktima, problemado na nga kaming manggagawa kung paano pagkakasyahin ang kakarampot naming sahod, tapos dadagdag pa sa pangamba namin itong iba’t ibang porma ng paglabag sa aming karapatan,” ayon sa pahayag ni Ustarez.
Kinukundena din ni Ustarez ang pagpapatuloy ng red-tagging para sa mga labor groups at iba pang progresibong grupo na nananawagan lamang ng katarungang panlipunan para sa manggagawa at mahihirap.
Sinabi ng labor leader na nagpapatuloy pa rin ang pagpaslang sa mga lider ng union at maging sa mga aktibistang mula pa sa ibat-ibang mga grupo sa mga nagdaang taon.
Ayon sa 2021 Global Rights Index ng International Trade Union Confederation (ITUC), muling nanguna ang Pilipinas sa 148-bansa bilang ‘countries with the worst violation of workers’.
Ito ay dahil na rin simula pa noong 2016 ay umaabot na sa 50-trade unionist ang napaslang buhat ng magsimula ang pamumuno ng administrasyong Duterte.
Una ng nananawagan ang Catholic Bishops’ Conference of the Philippines sa pamahalaan na magpatupad ng mga polisiyang tutulungan ang mga manggagawa at mga pamilyang kanilang sinusuportahan na mapabuti ang antas ng kanilang pamumuhay.
