17,509 total views
Nanawagan si Benedictine nun Sr. Mary John Mananzan, OSB sa mamamayan partikular na sa mga kabataan na bumoto sa nalalapit na halalan sa darating na May 12, 2025.
Ayon sa Madre, mahalaga ang aktibong pakikibahagi ng bawat isa upang makapaghalal ng mga opisyal ng bayan na tunay na makapagbabago at makapagpapabuti sa lipunan.
Paliwanag ni Sr. Mananzan, dapat na maging mapanuri ang bawat botante sa mga kandidato na may integridad at platapormang tunay na makabubuti para sa mas nakararami.
“Nananawagan ako first of all bumoto kayo unang una yun, ikalawa kapag bumoto kayo titingnan niyo kung ang kandidato number 1 is person with integrity unang una yun at saka kung sila ay talagang may plataporma at kung ang plataporma nila ay para sa kabutihan ng nakakarami hindi lang para sa very few.” Bahagi ng pahayag ni Sr. Mananzan sa Radio Veritas.
Sa datos ng Commission on Elections (COMELEC) umabot sa 184 ang bilang ng mga naghain ng certificates of candidacy (COC) sa pagka-senador, habang 190 naman sa hanay ng mga partylist na pawang binubuo ng ilang mga dati ng pulitiko, artista, at maging mga social media personality.
Batay sa tala ng COMELEC, aabot sa mahigit 69.6 na milyon ang bilang ng mga rehistradong botante para sa nalalapit na 2025 National and Local Elections kung saan kinakailangang maghalal ng mahigit sa 18,200 mga bagong opisyal ng bayan na kinabibilangan ng 12-senador, mga partylist representatives, congressional district representatives, governor, mayor, sangguniang bayan member at iba pa.
