312 total reads
Nagbabala si Kidapawan Bishop Jose Colin Bagaforo laban sa mga nagpapanggap at ginagamit ang kanyang pangalan at pagkakakilanlan bilang lingkod ng Simbahan upang makapanglinlang ng mga mananampalataya.
Ibinahagi ng Obispo na siya ring kasalukuyang chairman ng Catholic Bishops’ Conference of the Philippines – Episcopal Commission for Inter-religious Dialogue ang larawan ng isang email address na ginagamit ang kanyang larawan at pangalan upang magpadala ng mensahe hindi lamang sa mga kapwa Pari kundi maging sa mga mananampalataya.
Makikita sa larawan ang litrato at pangalan ni Bishop Bagaforo na may email address na ‘[email protected]’. Paglilinaw ni Bishop Bagaforo na siya ring kasalukuyang Co-President ng Pax Christi International, hindi niya pagmamay-ari ang nasabing email address kaya naman ang anumang mensahe mula rito ay walang katotohanan at hindi dapat pagkatiwalaan.
Paalala ng Obispo, sakali mang makatanggap ng mga kaduda-dudang mensahe o solicitation letter lalo na sa pamamagitan ng online ay marapat na agad makipag-ugnayan sa tanggapan ng parokya o ng diyosesis upang matiyak ang pagiging lehitimo ng natanggap na sulat o mensahe.
“Baka others have received such scam, someone is using my name and sending emails. His fake email address is [email protected]. My appeal, if ever others have received that they ignored it, that they check if the sending email.is really me in my correct email add.” Bahagi ng abiso ni Bishop Bagaforo sa Radyo Veritas.
Kaugnay nito patuloy na pinapaalalahanan ng Simbahang Katolika ang mananampalataya na mag-ingat laban sa mga mapagsamantalang indibidwal o grupo na ginagamit ang pangalan ng Simbahan, kongregasyon, cardinal, obispo, pari, madre at iba pang lingkod ng Simbahan upang makapanglinlang at makapangalap ng pinansyal na donasyon.
