510 total reads
Muling inilunsad ng Alyansa Tigil Mina ang “Mining Hell Week” kasama ang mga lider ng limang komunidad na nagtayo ng barikada laban sa pagmimina upang igiit ang pagpapatigil sa mapaminsalang operasyon ng pagmimina at kanselahin ang mga permit ng mga kumpanya.
Ayon kay ATM national coordinator Jaybee Garganera, layunin ng pagpunta ng mga lider sa Maynila na maiparating sa Department of Environment and Natural Resources (DENR) ang panawagang kanselahin ang mga umiiral na mining permit sa kanilang mga lugar.
“By coming to Manila, the leaders are essentially bringing their barricades to the city, hoping the DENR will urgently address their complaints and cancel existing mining permits,” pahayag ni Garganera.
Ibinahagi ng mga lider mula sa MacArthur, Leyte; Sibuyan Island, Romblon; Homonhon Island at Manicani Island sa Eastern Samar; at Dupax del Norte, Nueva Vizcaya ang kanilang patuloy na pagbabantay at pagtatayo ng mga barikada upang pigilan ang operasyon ng pagmimina na nagdudulot ng pinsala sa kalikasan at kabuhayan ng komunidad.
Iginiit ng mga residente na dapat kanselahin ng DENR ang mga permit ng mga kumpanyang sangkot sa pagmimina dahil sa paglabag sa mga batas pangkalikasan at kakulangan ng maayos na konsultasyon sa mga apektadong mamamayan.
Kasabay ng paglulunsad ng Mining Hell Week, inilabas din ng ATM ang ulat na “UnderMining Rights: Mining-Induced Human Rights Violations and Environmental Destruction,” na tumatalakay sa mga paglabag sa karapatang pantao at pagkasira ng kalikasan dulot ng malawakang pagmimina.
Pinuna rin ni Garganera ang administrasyon ni Pangulong Ferdinand Marcos, Jr. dahil sa mas agresibong pagsusulong ng malakihang pagmimina na nagdudulot ng pinsala sa kalikasan at sa mga pamayanan.
“We also hope that through this report, the various issues concerning mining-affected communities, particularly human rights violations and abuses, will be surfaced and eventually addressed,” ayon kay Garganera.
Isasagawa ang Mining Hell Week mula March 9 hanggang 14, 2026 na may temang “Baha ng Mina, Barikada ang Depensa!”, tampok ang serye ng mga gawain at pagkilos sa pambansa at lokal na antas na magbibigay-diin sa mga panawagan at pakikibaka ng mga komunidad na apektado ng pagmimina.
