381 total views
Nanawagan ng pagkakaisa, kabanalan, at kabutihan si Antipolo Bishop Ruperto Santos sa paggunita ng diyosesis sa ika 400 anibersaryo ng pagdating sa Pilipinas ng Nuestra Señora de la Paz y Buen Viaje, o Mahal na Birhen ng Antipolo, nitong June 18.
Sa panayam sa Radio Veritas, sinabi ng obispo na nananatiling mahalagang huwaran ang Mahal na Birhen para sa mga Pilipino, lalo na sa gitna ng mga suliraning kinakaharap ng bansa.
“Nakikita natin ngayon ang kawalan ng pagkakaisa. At ang taong nagdudulot sa atin ng pagkakaisa ay ang isang ina. Kaya dapat tayong tumawag, lumapit, at magtiwala sa ating Mahal na Ina upang tayong mga Pilipino ay muling magkaisa,” ayon kay Bishop Santos.
Bahagi ng makasaysayang pagdiriwang ang fluvial procession sa Laguna de Bay na nagsariwa sa paglalayag ng imahe ng Mahal na Birhen mula sa Mexico at dumating sa Pilipinas noong June 18, 1626.
Mula sa Calamba City, Laguna, ay tinahak ng pilgrim image ang lawa patungong Talim Island, Binangonan, Cardona at Pasig bago dinala sa pamamagitan ng prusisyon patungong Taytay at sa International Shrine of Our Lady of Peace and Good Voyage sa Antipolo City.
Ayon sa obispo, layunin ng pagdiriwang na higit pang maipakilala sa mga mananampalataya ang malalim na debosyon sa Birhen ng Antipolo, na kinikilala bilang Ina ng mga Pilipino.
“Ginagawa natin ito upang ipakita kung sino ang ating ina. Ipinakikilala natin siya, ipinagmamalaki natin siya. Ito ang Mahal na Birhen ng Antipolo, ang Ina ng mga Pilipino,” ani Bishop Santos.
Kasabay ng paggunita ang pagbabalik-tanaw sa natatanging ugnayan ng pambansang bayaning si Gat Jose Rizal sa Birhen ng Antipolo.
Ayon sa kasaysayan, namata ang kanyang inang si Doña Teodora Alonso na dadalhin sa Antipolo ang batang Rizal bilang pasasalamat matapos ang ligtas na panganganak.
Nagtungo si Rizal, kasama ang kanyang ama na si Francisco, sa dambana ng Birhen ng Antipolo noong June 6, 1868 upang tuparin ang panata ng kanyang ina sa Mahal na Birhen.
Bilang paggunita, nagtungo ang pilgrim image sa Calamba City, Laguna, partikular sa Saint John the Baptist Parish, ang simbahan kung saan bininyagan ang pambansang bayani.
Binisita rin ng imahe ang tahanan ng pamilya Rizal bago isinagawa ang fluvial procession pabalik sa dambana ng Mahal na Birhen.
“Napakaganda ng ginawa ng ating pambansang bayani. Pumunta siya sa Antipolo. Nagpasalamat siya. Kinilala niya ang kabutihan ng Diyos. At ipinakita niya na may kabutihan sa tao,” dagdag ng obispo.
Binigyang-diin din ni Santos na ang kasalukuyang kalagayan ng lipunan ay nangangailangan ng pagbabalik sa mga pagpapahalagang ipinakita nina Rizal at ng Mahal na Birheng Maria.
“Hindi lamang kawalan ng pagkakaisa ang nakikita natin ngayon. Nakikita rin natin ang pagiging makasarili. Ang iniisip ng marami ay ang kanilang sariling kapakanan,” ani Bishop Santos.
Dahil dito, hinimok ng obispo ang mga mananampalataya na unahin ang Diyos at isabuhay ang kabutihan.
“Kailangan natin ngayon ng kabanalan. Ang kabanalan ay ang pag-una sa Diyos, hindi sa sariling kapakanan, kaginhawahan, kalusugan, o kaligtasang pansarili lamang,” paliwanag ng pastol.
Iginiit ni Bishop Santos na ang kabutihan at pananampalataya ang mahalagang sandigan upang maibalik ang pagkakaisa ng bansa.
Hamon ni Bishop Santos sa bawat isa na isabuhay ang mga gawi ng Mahal na Birhen na buong pusong sumunod sa kalooban ng Diyos, at ang mga halimbawa ni Rizal na inuuna ang kapakanan ng bayan kahit kapalit ang paghihirap at kamatayan.
Kasabay ng pagdiriwang ay inilunsad din ng international shrine ang mga commemorative stamps bilang paggunita sa apat na siglong paglalakbay ng Mahal na Birhen mula Mexico patungong Pilipinas sakay ng galyon.
Sinabi ng obispo na ang bagong serye ng mga selyo ay magsisilbing paalala, lalo na sa mga Pilipinong nasa ibang bansa, na may isang Ina na kanilang malalapitan at mapagkakatiwalaan.
Paanyaya ni Bishop Santos sa mga mananampalataya na patuloy na makiisa sa buong taong pagdiriwang ng hubileyo para sa ika-400 taon ng pagdating ng imahe at ika-100 anibersaryo ng kanyang canonical coronation na magtatapos sa November 28, 2026
