26,732 total reads
Nanindigan si Pope Leo XIV na hindi digmaan ang tugon sa anumang hindi pagkakaunawaan kundi dayalogo.
Sa kanyang Angelus sa St. Peter’s Square, nanawagan si Pope Leo ng kapayapaan sa gitna ng lumalalang mga digmaan sa mundo, binigyang-pugay ang kabataang Kristiyano, at inanunsyo ang nalalapit na World Youth Day sa South Korea.
Binigyang-diin ni Pope Leo ang presensiya ng mga perigrinong kabataan sa Roma na lumahok sa Jubilee of Young People, bilang tanda ng pag-asa na ang pagkakapatiran ay posible sa kabila ng pagkakaiba ng kultura, tradisyon at paniniwala.
“My young brothers and sisters, you are the sign that a different world is possible: a world of fraternity and friendship, where conflicts are not resolved with weapons but with dialogue,” ayon kay Pope Leo.
Inihayag ng santo papa ang kanyang pakikiisa lalo na sa mga kabataang nagdurusa sa digmaan sa Ukraine at Gaza, gayundin sa iba pang lugar, lalo na sa Middle East, kung saan maraming tao na ang lubhang apektado at napilitang lisanin ang kanilang lugar para sa kaligtasan.
Umaasa ang punong pastol sa mahigit isang bilyong Katoliko sa mundo na pagsumikapan ng mga kabataan na maging asin at liwanag sa mundong nababalot ng dilim dulot ng digmaan, kahirapan at iba pang suliraning panlipunan.
“With Christ, it is possible! With his love, with his forgiveness, and with the power of his Spirit,” saad ng santo papa.
Kasabay nito, inanunsyo ni Pope Leo ang pagdaraos ng World Youth Day mula Agosto 3 hanggang 8, 2027, na unang itinakda ni noo’y Pope Francis sa South Korea.
Ang tema ng WYD 2027 ay “Take courage! I have overcome the world,” na hango sa Ebanghelyo ni San Juan, kabanata 16, talata 33—isang hamon sa bawat kabataang patuloy na manindigan sa misyong iniatang ni Kristo na ibahagi ang Mabuting Balita sa buong mundo.
Ang Jubilee of Young People ay bahagi ng Extraordinary Jubilee na inilunsad ng Simbahang Katoliko upang hikayatin ang kabataan sa mas malalim na pananampalataya at pakikiisa.(
