15,526 total views
Inaanyayahan ni Antipolo Bishop Ruperto Santos ang mga mananampalataya na makibahagi sa taunang pilgrimage season sa International Shrine of Our Lady of Peace and Good Voyage at tanggapin ang plenary indulgence na ipinagkaloob ng Simbahan.
Kasabay ng tradisyunal na “pag-ahon” noong May 5, sa kapistahan ng Mahal na Birhen ng Antipolo, pormal na binuksan ng obispo ang tatlong buwang panahon ng debosyon at panalangin.
“Tayo na sa Antipolo, sama-sama tayong manalangin, magsimba at magparangal sa ating Mahal na Ina,” pahayag ni Bishop Santos sa Radyo Veritas.
Ayon sa obispo, ang mga debotong makikibahagi sa mga pagdiriwang, kabilang ang Banal na Misa at mga debosyon, ay maaaring tumanggap ng plenary indulgence alinsunod sa karaniwang kondisyon ng Simbahan.
Isinasagawa ang pilgrimage season mula unang Martes ng Mayo hanggang unang Martes ng Hulyo, na tampok ang nobenaryo at mga prusisyon. Pangungunahan ito ng iba’t ibang obispo mula sa buong bansa, patunay sa pambansang kahalagahan ng debosyon sa Mahal na Birhen ng Antipolo.
Kabilang sa mga inaasahang magdiriwang ng Misa sina Archbishop Gilbert Garcera, pangulo ng Catholic Bishops’ Conference of the Philippines, at Archbishop Charles Brown na mangunguna sa pagtatapos ng pilgrimage season.
Inihayag din ni Bishop Santos na tampok sa pagdiriwang ngayong taon ang ika-400 anibersaryo ng pagdating ng imahe ng Nuestra Señora de la Paz y Buen Viaje sa Pilipinas at ang ika-100 taon ng canonical coronation nito, kung saan maglalabas din ng commemorative stamps sa July 7 bilang paggunita sa mga mahalagang selebrasyon.
Sa kanyang homiliya, binigyang-diin ng obispo na ang debosyon sa Mahal na Birheng Maria ay dapat maglapit sa mga mananampalataya kay Hesus.
“Ang lahat ng ginawa ng mahal na Birheng Maria ay hindi para sa kanyang sarili datapuwa’t upang mailapit tayo sa Diyos,” ani Bishop Santos.
Ibinahagi rin ng pastol ang tatlong aral mula sa buhay ng Mahal na Birhen: “Kababaang-loob. Katapatan. Kabutihan.”
Binigyang-diin ng obispo na ang lahat ng tinatamasa ng tao ay mula sa Diyos at dapat gamitin nang may pananagutan.
Tayo lamang ay katiwala ng Diyos dito sa lupa. Ang lahat ng sa atin ay pahiram lamang ng Diyos,” aniya.
Hinimok din niya ang mga mananampalataya na manatiling tapat sa kanilang mga pangako at sumunod sa kalooban ng Diyos, tulad ng tugon ni Maria na “Mangyari sa akin ang iyong sinabi.”
Para kay Bishop Santos, ang pag-ahon sa Antipolo ay hindi lamang pisikal na paglalakbay kundi isang espirituwal na pagpapalalim ng pananampalataya.
“Ang lahat ng kanyang ginawa at ipinakita, sinabi o naging habilin ay nararapat lamang na maghahatid sa atin upang si Jesus ay ating makilala nang lubusan, mamahalin natin nang labis, at magbubunsod sa atin na si Jesus ay mapaglingkuran nang higit,” ani ng obispo.
Muling inaanyayahan ng obispo ang mga deboto na dumalaw sa international shrine at makiisa sa mga mahahalagang pagdiriwang sa malalim na debosyon ng mga Pilipino sa Mahal na Birheng Maria, Ina ng Kapayapaan at Mabuting Paglalakbay.
