11,664 total views
Nagdadalamhati ang Diyosesis ng Borongan sa pagpanaw ni Fr. Alejandro “Alex” Galo, na kilala sa paninindigan laban sa operasyon ng pagmimina sa Eastern Samar.
Batay sa paunang ulat ng pulisya, ang 66 taong gulang na pari ay sakay ng kanyang motorsiklo nang mabangga ng paparating na sasakyan bandang alas-8 ng umaga, nitong Miyerkules sa Barangay Naubay, Llorente, Eastern Samar.
Kasalukuyan namang nasa kustodiya ng Llorente Municipal Police District ang babaeng driver na nakabangga kay Fr. Galo.
Sa inilabas na pahayag ng Diyosesis ng Borongan, hiniling ni Diocesan Chancellor Fr. James Abella ang panalangin para sa kapayapaan ng kaluluwa ni Fr. Galo.
“We ask for your prayers during this difficult time as we honor the life and legacy of a remarkable servant of God… Let us come together in prayer, remembering Fr. Alex in our hearts and asking for God’s comfort for all who mourn his loss,” ayon kay Fr. Abella.
Kilala si Fr. Galo bilang matapang at mariing tumututol sa pagmimina sa lalawigan, na inilaan ang paglilingkod sa pagpapalaganap ng kamalayan hinggil sa mga usaping pangkalikasan at karapatan ng mga pamayanan.
Dahil sa kanyang adbokasiya, naranasan ng pari ang paninirang-puri, panggigipit, at maging pagbabanta buhay.
Bago ang kanyang pagpanaw, si Fr. Galo ang namamahala sa Commission on Church Properties at Commission on Cemeteries ng diyosesis.
