33,895 total views
Tiniyak ng Diyosesis ng Virac ang pagtulong at pag-agapay ng Simbahan sa mga naapektuhan ng pananalasa ng Super Typhoon Uwan sa Catanduanes.
Sa pamamagitan ng Caritas Virac Justice and Peace, Inc. ay nananawagan ang diyosesis ng tulong at pakikiisa para sa mga pamilyang labis na naapektuhan ng pananalasa ng Super Typhoon Uwan na nagdulot ng matinding pinsala sa mga tahanan at kabuhayan sa lalawigan.
Sa temang “Rebuilding Our Homes, Restoring Our Hope,” ay binigyang diin ng Diyosesis ng Virac na ang bawat tulong, maliit man o malaki ay pawang tanda ng pag-ibig at pag-asa para sa mga Catandunganon upang muling makabangon sa pamamagitan ng diwa ng pag-asa at pagkakaisa sa lipunan.
“Catanduanes, our beloved Happy Island, needs our help to rise again after Super Typhoon Uwan. The Diocese of Virac, through Caritas Virac Justice and Peace, Inc., is committed to helping our communities recover. Our island needs your help! Every act of kindness, every donation, brings us closer to rebuilding lives and homes. Let’s show the world the resilience and spirit of Catanduanes.” Bahagi ng panawagan ng Diyosesis ng Virac.
Pangungunahan ng Caritas Virac Justice and Peace, Inc. ang pagtanggap ng donasyon para sa patuloy na relief operations at rehabilitasyon sa mga nasalanta ng Super Typhoon Uwan.
Ilalaan ang mga pondong malilikom para sa pagkain, tubig, gamot, materyales sa pansamantalang tirahan, at iba pang pangunahing pangangailangan ng mga apektadong pamilya sa lalawigan.
Hinihikayat ng Diyosesis ng Virac ang lahat ng mga parokya, institusyon, at mamamayan na may pusong handang tumulong na makibahagi sa gawain ng pagpapamalas ng awa at pag-asa para sa mga naapektuhan ng kalamidad.
“The Diocese of Virac, through Caritas Virac Justice and Peace, Inc., is issuing a Call for Donations for the victims of Super Typhoon Uwan. Your support is critical for the relief and social action efforts in the aftermath of this devastating storm. Let us stand together to help our fellow Catandunganon rebuild. Donate today and be a beacon of hope!” Dagdag pa ng Diyosesis ng Virac.
Para sa mga detalye kung paano makapagpapaabot ng tulong at donasyon ay maaring makipag-ugnayan sa Caritas Virac Justice and Peace, Inc. o bisitahin ang Facebook page ng Diocese of Virac.
Ayon sa diyosesis sa pamamagitan ng pagkakaisa ng Simbahan at sambayanan ay muling maitatayo hindi lamang ang mga nasirang tahanan, kundi pati ang pag-asa at pananampalataya ng mga taga-Catanduanes na nasalanta ng Super Typhoon Uwan.
Matatandaan bilang tanda ng pagkakaisa at malasakit ng Simbahan para sa mga nangangailangan mula sa pananalasa ng bagyo ay binuksan ng Diyosesis ng Virac ang mga Simbahan nito upang magsilbing evacuation centers para sa mga pamilyang apektado ng Super Typhoon Uwan upang makapagbigay ng mas ligtas na masisilungan, at pag-asa para sa mga evacuees sa gitna ng sama ng panahon.
