2,026 total views
Kapanalig, malaki ang bahagi ng enerhiya sa kaunlaran ng kahit anong bayan. Ang sektor ng enerhiya ay napakahalaga hindi lamang sa dami ng trabaho na nalilikha nito, kundi dahil ang enerhiya ang nagpapatakbo ng maraming mga operasyon sa iba ibang industriya at sektor sa buong mundo. Ang enerhiya rin ang nagbibigay kuryente sa ating tahanan, at langis para sa ating paroot-parito.
Habang tumatagal ang panahon, ang energy demand ng ating bansa, at maging sa maraming mga bansa sa buong mundo ay patuloy na tumataas. Ayon nga sa International Energy Agency (IEA), tinatayang kailangan ng humigit kumulang na US$38 trillion upang mapunan natin ang energy demand sa buong mundo. Ayon naman sa Institute of Energy Economics Japan, ang mga bansa ng China, India, at mga bansa na kasapi ng Association of Southeast Asian Nations gaya ng Pilipinas ay mas tataas pa ang konsumpsyon ng enerhiya sa darating pang mga taon.
Maraming implikasyon ang pagtaas ng demand at konsumpsyon ng enerhiya sa ekonomiya ng isang bansa. Unang una, sustainability ng supply.
Kapanalig, maraming mga pagkakataon na nagiging kulang ang suplay ng enerhiya sa maraming lugar sa ating bansa, lalo na sa panahon ng tag-init. Nagkakaroon ng mga brownouts sa maraming mga lugar sa Mindanao, halimbawa. Kapag tataas ang demand, saan pa tayo kukuha?
May implikasyon din ito sa presyo. Dahil mas mataas ang demand at hindi sapat ang suplay, maaring tumaas ang presyo. Kaya pa ba ng karaniwang Pilipino bayaran ang mas mataas na halaga ng kuryente, kahit hindi naman tumataas ang sweldo?
Malaki rin ang epekto ng pagtaas ng demand sa enerhiya sa ating kapaligiran. Kapanalig, hindi naman nanggagaling sa mga renewable sources gaya ng araw o tubig ang lahat ng ating kuryente. Ang totoo, ang bulko ng ating suplay ay mula sa coal at langis, na minimina pa at naglilikha din ng mga emissions na masama sa katawan ng tao pati na rin sa ating kapaligiran. Ang mga emissions na ito ay nagpapa-init ng mundo at nagpapalala ng epekto ng climate change.
Kapanalig, tumataas ang worldwide population. Halos lahat tayo ay nakadepende na sa enerhiya para sa halos lahat din ng ating pang-araw araw na gawain. Kailangan natin makontrol ang pag-gamit ng kuryente, mas palawigin ang mga renewable sources, at gumawa ng mga teknolohiya na mas energy efficient. Nakasalalay sa mga ganitong pagkilos hindi lamang ang halaga ng kuryente, kundi ang ating kinabukasan.
Isang paalala mula sa Sollicitudo Rei Socialis ang nawa’y gumising sa atin: Ang lahat ng material na bagay at ang pagpalago at pag-gamit natin sa kanila ay mga biyayang mula sa Panginoon. Nilalayon ng mga ito na ilabas ang ating angking pagkakakilanlan bilang mga anak ng Diyos.
Sa ating pag-gamit ng enerhiya tungo sa kaunlaran, alalahanin natin na ito ay biyayang dapat nating inaalagaan at hindi nilulustay.
