1,158 total reads
Ito ang hamon ni Father Rudsend Paragas, SSS – Rector and Parish Priest ng Archdiocesan Shrine of the Blessed Sacrament, Sta. Cruz Parish and Our Lady of the Pillar Church sa mga mananampalataya matapos ipagdiwang ng parokya ang Kapistahan ng Nuestra Señora del Pillar noong linggo, ika-21 ng Oktubre.
Ayon kay Father Paragas, hindi lamang mga Pari, Relihiyoso at Relihiyosa ang maaaring maglingkod, dahil tungkulin ito ng bawat binyagang Katoliko.
Inihayag ng Pari na si Maria ang huwaran ng paglilingkod na puno ng kababaang loob, at walang panghuhusga sa kapwa.
Sinabi ni Father Paragas na pinapaalalahanan din ng Mahal na Birhen ang bawat mananampalataya sa kanilang tungkulin na maglingkod sa Simbahan at sa kapwa.
“Yung paglilingkod ay hindi lang naman doon sa Pari saka dun sa mga Religious kung hindi sa bawat isa sa atin na bininyagan. Meron tayong inspirasyon at ang inspirasyon natin ay kung paano maglingkod si Maria, hindi lang yung humility kung hindi yung paglilingkod na walang judgement, alam mong tututukan, at punong-puno ng pagbabantay,” pahayag ni Father Paragas sa Radyo Veritas.
Dahil dito, upang lalo pang maimulat ang mga mananampalataya sa paglilingkod, sinabi ni Father Paragas na dinadala nila ang birhen ng del Pillar sa iba’t-ibang barangay na nasasakupan ng kanilang parokya.
Ipinaliwanag ng Pari na sa pagdalaw ng mahal na birhen sa bawat Barangay ay dinadala nito si Hesus at naitataguyod ang pagkakaroon ng paggalang sa kapwa, katarungan, pagmamahal, pagtatawad at pagkakaisa.
“Meron kaming tinatawag na dalaw ng Del Pillar sa bawat lugar. At sa tuwing dumadalaw kami sa bawat area, nire-remind namin sila na yung pagdalaw na yun ay hindi si Maria kun’di yung binibigay sa kanila na biyaya ay si Kristo, at ‘pag pinagusapan natin si Kristo, yan yung hustisya, yan yung respeto sa bawat isa, yung pagmamahal, pagpapatawad, pagkakaisa.” dagdag pa ni Father Paragas.
Ikinagagalak ng pari na positibo ang pagtugon dito ng mga mananampalataya.
Tinukoy ng Pari na sa tulong ng dalaw ng Del Pillar ay marami na ang mas nagiging aktibo sa Simbahan, nagpapakita ng kasabikan sa salita ng Diyos, at kasiglahan ng puso ng bawat mananampalataya na makapaglingkod.
