513 total reads
Ito ang mensahe ni Novaliches Emeritus Teodoro Bacani Jr. sa nalalapit na pagdiriwang ng Pasko at Bagong Taon.
Tinukoy ng Obispo na likas sa bawat Filipino ang maging masayahin at puno ng pag-asa sa kabila ng mga karanasan at pagsubok.
“Ang mga Pilipino ay mapag-asang bayan, tayo po ay punong puno ng pag-asa ano man ang nangyayari, sinabi natin sa ating sarili God is good at may bukas pa. At mas maganda pa ang bukas,” pahayag ni Bishop Bacani.
Base sa pinakahuling ulat ng Social Weather Station, 47 porsiyento sa mga Filipino ang umaasa ng mas magandang buhay sa susunod na taon at ang paglakas ng ekonomiya ng bansa.
Sa kabila nito, ipinaalala ng Obispo sa bawat isa na bukod sa pagtitiwala sa Panginoon ay kailangan din ang pagpupunyagi upang makamtan ang mga kahilingin at pagpapalang hiling.
“Ngunit sikapin po natin na habang ipinapaubaya natin sa biyaya ng Panginoon ay pagsikapan natin sa sipag at tiyaga at panalangin na makamtan. Kaya umasa tayo ng mas magandang 2018 at mas matitinong mga public officials sa 2018,” ayon pa kay Bishop Bacani.
Ang survey ay isinagawa sa pamamagitan ng face-to-face interviews sa 1,500 respondents na nasa edad 18 taong gulang pataas na mula sa Luzon, Visayas at Mindanao.
