5,673 total views
Umapela si Taytay Bishop Broderick Pabillo, chairperson ng CBCP Office on Stewardship, sa mga Pilipino na huwag gawing normal ang kultura ng korapsyon na patuloy na sumisira sa lipunan at naglalagay sa alanganin sa buhay ng mamamayan.
Sa kanyang pastoral na liham, binigyang-diin ng obispo na malinaw na ang katiwalian ay hindi kailanman katanggap-tanggap.
“Huwag nating tanggapin na kalakaran na ang korapsyon — ito ay pagnanakaw sa buwis ng taumbayan,” ani Bishop Pabillo.
Binigyang diin ng obispo na ang pondo ng bayan ay dapat nakalaan sa mga pangunahing serbisyo tulad ng ospital, maayos na kalsada, tubig, at kuryente—ngunit nananatiling kulang dahil sa maling paggamit at pamumulitika.
Sa kanyang mga pastoral visit sa malalayong lugar ng Northern Palawan, personal nasaksihan ng obispo ang mga pamayanang walang sapat na pasilidad at hindi nabibigyan ng tamang atensyon ng pamahalaan.
Dagdag pa ni Bishop Pabillo, hindi magiging maayos ang takbo ng pamahalaan kung ang mga nasa puwesto ay nakuha lamang ang kanilang kapangyarihan sa pamimili ng boto.
Mariin ding kinondena ng obispo ang tinatawag na SOP o “Standard Operating Procedure” sa mga proyekto at programa ng gobyerno na aniya’y malinaw na gawain ng kasamaan.
Binigyang-diin din ni Pabillo ang panganib ng political dynasty na nagpapalala ng sistematikong korapsyon sa bansa.
“Kung gusto nating mabawasan ang korapsyon, huwag na tayong bumoto ng mga magkamag-anak,” giit ng obispo.
Kaugnay nito, tinukoy ng obispo ang Trillion Peso March na isinagawa noong Setyembre 21 bilang patunay ng pagkakaisa ng taumbayan laban sa katiwalian.
“Magbabago ang bansa kung mawawala ang korapsyon — dapat singilin ang mga namumuno,” dagdag pa ni Bishop Pabillo.
Samantala, kasalukuyang iniimbestigahan ng Kongreso ang multibillion-peso ghost at substandard flood control projects ng Department of Public Works and Highways (DPWH), gayundin ang mga bilyong pisong insertions ng mga mambabatas sa national budget.
