16,378 total views
Pinaalalahanan ni Manila Archbishop Jose Cardinal Advincula ang mga mananampalataya na higit pa sa tradisyon at parada ang kahulugan ng Santacruzan bilang pagpapahayag ng pananampalatayang Kristiyano.
Sa kanyang mensahe ngayong panahon ng Santacruzan, binigyang-diin ng kardinal na mahalagang maunawaan ng sambayanan ang tunay na diwa ng naturang tradisyong Pilipino.
“Ang Santacruzan ay hindi lamang isang makulay na tradisyon, at lalong hindi ito isang beauty pageant, kundi isang paanyaya at paalala sa atin na ipagmalaki at isabuhay ang ating pananampalataya,” pahayag ni Cardinal Advincula sa Radio Veritas.
Ayon sa arsobispo, pagkakataon din ang pagdiriwang upang higit na mapalalim ng mga mananampalataya ang kahulugan ng krus sa kanilang buhay bilang mga Kristiyano.
“Muli nating ginugunita hindi lamang ang paghahanap ni Santa Elena sa Banal na Krus, kundi ang mas malalim na kahulugan ng Krus sa ating buhay bilang mga Kristiyano,” ani ng kardinal.
Hinimok din ni Cardinal Advincula ang mga mananampalataya na tularan si Kristo sa pagharap sa mga pagsubok at paghihirap ng buhay nang may pananampalataya at pag-ibig.
“Matutuhan nating pasanin nang may pag-asa at pag-ibig ang mga krus ng ating buhay araw-araw. Nawa’y manatili tayong matatag sa pananampalataya at nagkakaisa bilang isang Simbahan,” dagdag pa ng kardinal.
Ang Santacruzan ay isa sa mga mayamang tradisyong Katoliko sa Pilipinas na ginaganap tuwing Mayo bilang paggunita sa pagkakatagpo ni Santa Elena sa Banal na Krus ni Hesukristo.
Ito rin ay naging bahagi ng Flores de Mayo na nagpaparangal sa Mahal na Birheng Maria sa pamamagitan ng pag-aalay ng mga bulaklak.
Higit sa isang makulay na prusisyon, ang Santacruzan ay tanda ng debosyon at pananampalatayang Kristiyano.
