2,295 total views
Pormal na itinalaga si Fr. Rufino “Jun” Sescon, Jr., bilang rektor at kura paroko ng Minor Basilica of the Black Nazarene o Saint John the Baptist Parish sa Quiapo, Manila.
Pinangunahan ng Kanyang Kabunyian Manila Archbishop Jose Cardinal Advincula ang banal na misa at ritu ng pagtatalaga kay Fr. Sescon, kasama sina Lingayen-Dagupan Archbishop Socrates Villegas, Novaliches Bishop Emeritus Teodoro Bacani, Jr., Lipa Archbishop Emeritus Ramon Arguelles, at mga pari, layko, at mananampalataya ng Arkidiyosesis ng Maynila.
Sa pagninilay ni Archbishop Villegas, pinaalalahanan nito si Fr. Sescon na ang misyong ipinagkaloob sa kanya ay malaking responsibilidad upang mapanatili at mapaigting ang pagpapalaganap ng pananampalataya lalo na ang debosyon sa Mahal na Poong Hesus Nazareno.
“Fr. Jun, be brave. Sa Quiapo bawal ang duwag. Huwag na huwag kang magiging duwag na manindigan para sa Diyos kahit ano ang mangyari. Kumapit sa krus, mabigat, masakit. Subalit ang bigat at sakit ng krus ay pagpapala para sa’yo at pagpapala para sa taumbayan,” bahagi ng pagninilay ni Archbishop Villegas.
Inihayag ng Arsobispo na mahalagang isa-alang-alang ni Fr. Sescon ang pagiging mapagpakumbaba at patuloy na tularan ang mga gawi ng Panginoon sa kabila ng mga nangyayaring pagbabago sa buhay-paglilingkod.
“Tumingala ka sa Nazareno. Be humble like Jesus. Be brave like Jesus. Be hopeful like Jesus. This is your mission and this is our prayer,” tagubilin ng Arsobispo.
Si Fr. Sescon ang dating chaplain ng Santo Niño de Paz Chapel sa Greenbelt, at Priest-in-charge ng Mary, Mother of Hope Chapel sa Landmark, Makati.
Ang bagong rektor ang humalili kay Msgr. Hernando Coronel na nagsilbi sa Quiapo Church simula taong 2015.
Samantala, isinagawa rin sa banal na pagdiriwang ang pormal na pagtanggap sa mga Parochial Vicars ng Quiapo Church na sina Fr. Robert Arellano, LRMS, Fr. Hans Magdurulang, at Fr. Jonathan Noel Mojica na makakatuwang ni Fr. Sescon sa paggabay sa mga mananampalataya at deboto ng Mahal na Poong Hesus Nazareno.