19,040 total reads
Pinuna ng Pangulo ng Catholic Bishops Conference of the Philippines (CBCP) ang integridad ng Independent Commission on Infrastructure o ICI matapos ang hindi pagdalo ng mga Discaya sa imbestigasyon ng independent body.
Ayon kay CBCP president Cardinal Pablo Virgilo David, sinabi niyang tila walang kapangyarihan ang ICI kung kayang balewalian ang imbestigasyong ipapatawag ng tanggapan.
“Toothless ICI? How will we believe in the capacity of ICI to investigate if they can simply be snubbed by the Discayas?,” ayon sa Facebook post ni Cardinal David.
Giit pa ni Cardinal David, kung kayang balewalain ng mga iniimbestigahan ang mga ipinapatawag ng ICI, mababawasan ang tiwala ng publiko sa kakayahan nitong magpatupad ng katarungan at kapangyarihan ng batas.
Dagdag pa ng obispo ng Kalookan, kailangang patunayan ng ICI na may kapangyarihan ito at kayang ipatupad ang batas nito upang maipakita na seryoso ang pamahalaan sa paglaban sa katiwalian at paniningil ng pananagutan.
Ang reaksyon ay kaugnay na rin sa ulat na hindi pagdalo ng mag-asawang Curlee at Sara Discaya sa isinasagawang imbestigasyon ng ICI.
Ang mag-asawang Discaya ay ang pangunahing isinasangkot sa mga iregularidad at katiwalian sa flood control projects ng Department if Public Works and Highways.
Sa ulat, ipinabatid ng mga Discaya sa pamamagitan ng kanilang abogado na hindi na ang mga ito makikipagtulungan sa isinasagawang imbestigasyon ng ICI.
Sa panig naman ni Bicol Saro Partylist Representative Terry Ridon, na hindi maaring nakadepende ang pakikipagtulungan ng mga tao sa ICI sa pangakong bibigyan sila ng kapalit tulad ng immunity o proteksyon bilang testigo ng estado.
Sa halip aniya ay dapat silang makipagtulungan dahil gusto nilang isiwalat ang katotohanan.
Sa kabila nito, sinabi rin ng mambabatas, na hindi karapat-dapat ang mag-asawang Discaya na maging state-witness.
“In any case, the Discayas cannot even be considered as prospective state witness as they are main principals in the massive plunder of public funds implemented through their construction firms,” ayon pa kay Ridon ang lead chairman ng House InfraComm na una na ring nagsagawa ng imbestigasyon kaugnay sa iregulirad sa flood control projects na kinasasangkutan ng mga Discaya, ilang mambabatas sa Kongreso at mga dating opisyal ng DPWH.
