10,921 total reads
Hinikayat ng Kanyang Kabanalan Pope Leo XIV si Manila Archbishop Jose Cardinal Advincula na ipagpatuloy ang kanyang ministeryo nang may katapatan at ganap na pagsunod sa tinig ni Kristo.
Ito ang mensahe ng santo papa sa pagdiriwang ng ika – 50 anibersaryo sa pagpapari at ika – 25 taon ng pagiging obispo ng cardinal ngayong 2026.
“We pray that, always listening to the voice of Christ, you may continue to fulfill your ministry in fidelity and obedience,” ayon sa mensahe ni Pope Leo XIV.
Kinilala rin ni Pope Leo ang pamumuno ni Cardinal Advincula sa Simbahan, partikular sa pangangalaga sa kaparian, paghuhubog ng mga seminarista, at pagpapatatag ng pagkakaisa ng mga mananampalataya.
“We reflect on your care for the clergy, the formation of seminarians, and the faithful entrusted to you, whom you have led commendably in unity.”
Binigyang-pugay din ng punong pastol ng Simbahang Katolika ang mahalagang papel ng Kardinal sa mas malawak na misyon ng Simbahan, kabilang ang kanyang paglilingkod sa Catholic Bishops’ Conference of the Philippines at sa iba’t ibang tanggapan ng Apostolic See.
“Your diligent service in the Catholic Bishops’ Conference of the Philippines and in various Dicasteries of the Apostolic See.”
Ipinagkaloob ng Santo Papa ang kanyang Apostolic Blessing hindi lamang sa Kardinal kundi maging sa kanyang mga katuwang sa ministeryo at sa buong sambayanan.
Ang mensahe ng Santo Papa ay patunay ng patuloy na pakikiisa ng Vatican sa Simbahan sa Pilipinas, lalo na sa pamumuno ni Cardinal Advincula na inaasahang magpapatuloy sa paggabay sa kawan ng Diyos sa diwa ng katapatan, pagkakaisa, at paglilingkod.
Si Cardinal Advincula ay inordinahang pari ng Archdiocese of Capiz noong April 14, 1976 habang naging obispo ng San Carlos noong September 8, 2001.
Binasa ni Papal Nuncio to the Philippines Archbishop Charles Brown ang mensahe ng santo papa para sa kardinal sa ginanap na Chrism Mass nitong Holy Thursday, April 2, sa Manila Cathedral.
